Assam Secretariat nung mi adok

Guwahati, August 31 (Agencies): Secretariat nungi osang ka ajanga ashiba agi, tanü Assam Secretariat ‘Janata Bhawan’ nungi mi adok saka tang tashi nung yiruba mesüra tasüba osang kecha mali.
Parnoki ashiba agi, mi ya Finance department-i mesema aliba ‘F’ block nung takdang ana nung tanü 12:00 ako shi nung adok aser iba kasa mapang nung Chief Minister Sarbananda Sonowal lenisüba kübok cabinet senden ka iba block den atongteba aliba CM Block nung agiya liasü.
Iba mi lendong nung takdang ana nung yua aliba file aser furniture tem ajak rongtokogo, ta osang ajanga metetdaktsü. Ajisüaka tang tashi nungbo mi ajanga kechi document temsa rongtok ajibo mejangjai lir.
Mi adokba ajanaga secretariat telungtet nung aliba nüburtem aoksatepa tensa mejungi aküm saka mi remsepba sülen idakji mapa inyakertem pei department office-i meyipa ao. Tang tashi nung nisung yiruba mesera asüba osang kecha mali, ta kasa osang ajanga metetdaktsü.
Fire service sangdong ka ajanga ashiba agi, mi remseptsü atema mi remsepba gari pongu tashi iba tesemi yoka mi remsep.
Mi kechi nungi jangruar tang tashi osang tejangjabo memetet, saka short circuit asüba ajanga mi adok südi, ta temolung melemi bilemba, kasa osang ajangasa metetdaktsü.