Assam sorkar akumba nung party-i tongtibang shilem ka agitsü: AIUDF

Guwahati, April 09 (Agencies): Honibarnü All India United Democratic Front (AIUDF) tongti, Badruddin Ajmal-i, Assam Assembly election nung par party-i junga inyaktsü aser election  agiba sülen sorkar akümba nung party-i tongtibang shilem ka agitsü, ta ashi.
Ajmal-i, “Süngo ayoker kati  Ato kilonser kümtetra, linük 27 nung perfume shishilembar tetsüdi kati Chuba mekümtettsü asü,” ta asüngdang.
Paisa ashiba agi, Bihar nung ama par party-i Assam nung grand alliance ka kümnüa liasü, ajisüaka Chief Minister Tarun Gogoi-i memulungi liasü.
“Bihar ama Assam nunga grand alliance aginüa liasü. Nitish (Bihar CM) aser Prashant (Nitish atema advisor) natia merangdangogo, ajisüaka CM Gogoi-i ibaji mataloktsü,” ta Ajmal-i ashi.
2005 küm nungi AIUDF-i Assam yimtenren nung ajemokba sülen mapang tatsüka nung parnok jenjang junga kümogo.
2006 Assembly elections nung parnoki menden 10 nung takok angu aser 2011 küm nungbo parnoki menden 18 tashi nung takok ngua assembly nung züngsem teimba aliba party tanabuba aküm.
2014 Lok Sabha election nunga Assam nung parnoki Congress party den kasa menden asem nung takok angu.