Assam sorkar hospital nung shirangertem hopta ka anisüngzük angutsü

Guwahati, November 14 (Agencies) : Sen 500 aser 1,000 senpaktem kija anünga aliba shirangertem mozükidang rongdak nüngdak atema amshitsü tagila sen malirtem den yariteptsü atema state sorkari mera tasen ka agiogo.
Centre sorkar-i joko magitsü ta sangdonger aliba senpaktem amshitsü lateta yutsüba anogo Hombarnü tatembang lir, ajisüaka Assam state sorkar-i sorkar mozü kidang amunger shirangertem atema tajemba agi hopta ka tashi item senpaktem amshitsü mapang atsülangtsür.
“Centre-i iba anogo matsülangtsü nungbo onoki sorkar mozükidang amungertem tajemba agi hopta ka tashi yaritsü atema tensa den apet sentong yanglua lir. Hombarnü centre-i kechi lemtetdir iba dakji ajak keta lir,” ta state finance minister Himanta Biswa Sarma-i ashi.
Hokolbarnü Union finance ministry-i item senpaktem November 11, 2016 tashi ang amshitsü melar aliba November 14, 2016 tashi mapang atsünglangtsü aser iba nungji sorkar mozükitem nung bill agütsütsü dena liasü.
Sarma-i, state tensa Hombarnü nungibo süngjema akümtsü. Sen joko terabo peria ngudar. SBI ketdangsertemi kü dang parnok indang ATM ajak Deobar aonung nungi mapa inyaktsü ta shiogo. State nung SBI ATM 3115 lir, ta ashi.
Nüburtemi timtem ajuruba ngua Honibarnü state chief minister Sarbananda Sonowal-i Reserve Bank of India indang regional director, BK Mishra den ajurutepa iba tebilemtsü lemsatepa liasü.
Sarma-i, Brihostibarnü nungi tang tashi nung SBI-i sen crore 2600 tashi parnok counter aser ATM tem nungi agütsüogo. Nija bank dena tanga bank temi tang tashi nung sen crore 1100 agütsüogo.