Assam sorkar mapa inyaker nem terenlok tajemba agi loan agütsütsü

Guwahati, March 22 (Agencies): Assam nung sorkar mapa inyaker ki asütsü asoshi loan agiba (housing loan) nung tetsürtem dang terenlok shilem 5 aser teburtemi dang shilem 5.5 agi agütsütsü aser ‘higher education’ atema loan agir nem terenlok shilem 4 agi agütsütsü asoshi Assam sorkar aser State Bank of India (SBI) tsüngda Memorandum of Understanding (MoU) ana Bodbarnü zülutepogo. Iba loan anaprong nung ‘collateral security’ aser ‘processing fee’ malitsü.
“Pradhan Mantri Vidya Lakshmi Karyakram (PMVLK) kübok 2015 küm August 15 nung finance ministry ajanga lapoktsüba www.vidyalakshmi.com nungi sorkar mapa inyaker chirtemi ‘education loan’ ya agitettsü,” ta Assam Finance Minister, Himanta Biswa Sarma-i ashi.
Sorkar mapa inyakertemi ki asütsü asoshi loan ya state sorkar indang “Apun Ghar” scheme kübok agitettsü aser iba loan ya sen lakh 15 tashi agitettsü.
“Sorkar mapa inyaker indang tanur-i loan ya sen lakh 10 tashi agitettsü aser pa mesüra la züngzüker küm ka ajungba sülen iba loan ya meyiba menok tenzüktsü. SBI ajanga iba loan nung terenlok ya shilem 11 lir saka sorkar mapa inyaker dang terenlok shilem 4 dang agitsü aser tanüngba terenlok shilem 7 ya state sorkari subsidy ama menoktsütsü,” ta Sarma-i ashi.
Iba MoU ya SBI NE Circle indang General Manager, Om Prakash Mishra aser State Additional Secretary, Finance, Devajyoti Hazarika tsüngda Bodbarnü zülutep aser iba sentong nung Sarma-a densema liasü.
“Assam sorkari iba teyari agütsüba ajanga terenlok jenjang aser EMI tajemba nung loan agiba ajanga sorkar mapa inyakertem ajangzüktsü. Collateral aser processing asüba nung taa magitsü aser jenjang tajemba nung mapang talangba agia iba loan menoktsü asoshi sentong lir,” ta SBI odongtar-i ashi.
“Iba scheme ya sorkar mapa inyaker rongnunga itasen tajemba agir atema lir saka sorkar mapa inyaker arishi küm 21 nungi tema aser mapa nung küm pongu tema inyaka alir ajungai agitsü akoktsü,” ta SBI, Guwahati nung Chief General Manager, PVSLN Murty-ia shisem.
Iba sentong tasenba nung SBI ajanga shilem tajung agiba asoshi Sarma-i pelaba ashi aser taruba küm May ita tashi nung iba loan ya tajemba agi nisung 10,000 nem bu agütsüdaktsünür, ta temepeshiba olen ka ashi.