Assam sorkar mapa inyakertemi CAB anema lungkak ait

North Lakhimpur, January 30 (Agencies): Assam nung state sorkar mapa inyakertem telok tulutiba Sadou Asom Karmachari Parishad (SAKP)-i tanü North Lakhimpur nung Citizenship Bill, 2016 anema lungkak ait.
SAKP züngsemtemi mapa meinyaki North Lakhimpur indang Deputy Commissioner office kima mener lungkak ait.
“Pei li dang nungi mapa tuluba masü” ta SAKP züngsemtemi yimyim ayim.
North Lakhimpur SAKP president Naren Kalita aser secretary Gautam Phukan nati ashiiba agi “ozüng alema arurtem anema noktakba Assam Agitation (1979-85) mapang taküm bendanga agütsür 855 nungi 68 ji SAKP züngsemtem liasü.”
Taoba mapang onok külem züngsemtemi taküm bendanga agütsüba ajanga SAKP-i maneni Assam asoshi inyaktsü tayongzükba angur, ta tenatisa ashi.
SKAP-i CAB anema mener lungkak aitba sentong nung AASU, All Assam Tribal Sangha aser tanga telok aika aden.
Külen, Lakhimpur District Congress Committee-ia Bodbarnü Citizenship Amendment Bill, 2016 anema nisungtem sendaktepa aoba sentong ka agi. Iba sentong nung nisung noklang pungu dak temai Deputy Commissioner Office nungi North Lakhimpur Girls’ HS School Chariali tashi noktak.