Assam sorkari ‘Act East’ department tenzüktsü: Sonowal

Guwahati, May 12 (Agencies): Brihostibarnü Assam Chief Minister, Sarbananda Sonowal-i, state sorkari ‘Act East’ department ka tentettsü, koba ajanga Centre-i benokba Act East Policy mapatong ajungkettsütsü, ta metetdaktsü.
“Ato kilonseri South East Asia den Northeast sendakteptsü mangdang yur tenzükba mapatong inyaktsü atema ozü sorkari ‘Act East’ department tentettsü,” ta Sonowal-i ashi.
State sorkari ‘Ease of Doing Business’ policy bo tenzükogo aser onoki asen linük densema alima tesem balala nungi investors ayongdentsü, koba ajanga Northeast tesem ya South East Asia leni aotsü atema rongsenkettsüng kikümbang asütsü, ta paisa metetdaktsü.
Facebook-i state sorkar den sentepa ayongba ‘Boost your Business’ sentong nung jembidang Chief Minister-i, “Yangi inyaktsü atema investor nem maongka agüja Assam sorkarisa Global business centre ana amenoktsü sentong yangludar,” ta ashi.
Sonowal-isa, alima ya yimtsüng ka mesüka kümogo, anungji lanurtemi mera agia north east tesem nung inyaktettsü mapatem bushitsüla aser ali nungi adokba rongsen tajungtiba agi amshitsü atema inyaktsüla, ta ashi.
Iba sorkari Assam jenjang tajungba akumtsü atema inyaker, aser ‘Skill India’, ‘Make in India’ aser ‘Start up India’ mapatongtem ajanga lanurtem aser entrepreneurs nem tashi agütsütsü, ta paisa metetdaktsü.
“Facebook indang Boost Your Business mapatong ajanga asen sentongtem tajungba akumtsü,” ta Chief Minister-isa shisem.
Kasa sentong nungsa Head of Programs for Facebook India, Ritesh Mehta-ia, ‘Boost Your Business’ mapatong ajanga local shishilembartem nem training agüja digital mapatong ajungkettsütsü, iba den külemi online ajanga shishilembaba ajanga rongsenkettsüng jenjang tajungba akumtsü, ta ashi.
Alima nung small & medium businesses indang Facebook pages million 65 tashi lir, aser India nung Facebook amshir shilem 57 bo shishilembaba tilateri ka nungbosa sendaktepa lir, ta paisa shisem.