Assam sorkari Delhi nung Hazarika kürakyanglu ayutsü

Guwahati, November 06 (Agencies): Yashi Assam Chief Minister, Tarun Gogoi-i, nüngtugu kentener Bhupen Hazarika indang kürakyanglu linük yimtiba, Delhi nung ayutsü atema yimti nung tetemsü tesem ka agüjang ta Delhi chief minister Arvind Kejriwal dang asüngdangtsü, ta shiogo.
Hazarika sür küm pezü ajungba anogomung nung yashi Guwahati nung Assam nüburtem atema Hazarika memorial lapoktsüba sentong nung Gogoi-i, Hazarika indang kürakyanglu Delhi nung dang masü saka Kolkata aser pa Ph.D agiba Columbia (USA) nunga pa indang kürakyanglu ayutsü atema inyaktsü, ta metetdaktsü.
“Onoki Dr Hazarika-i inyaktetbatemji India tzüküm adena orr alima ajak dang Assam sobaliba takar indang sangdongner,” ta pai ashi.
Asür nem tetushi tulu agüja Gogoi-i, “Pai (Hazarika) kin telemsa mesüra tamangba yimsü balala ajak longjemdaktsütsü meranga liasü. Pa mapatem ajanga tamangba lokti balala longjemdaktsütsü merangba den Assam sobaliba taliba takar kümdaktsü,” ta ashi.
State sorkari tekaraba nung Bhupen Hazarika Society tenzüktsü aser iba atema sen crore 10 lemzüktsütsü, ta paisa shisem.