Assam sorkari DGP tasen shim

Guwahati, December 11 (Agencies): CAB, 2019 anema Assam nung tensa mejungi akümba mapang ka State sorkari Bodbarnü DGP inyaktsü atema IPS officer Bhaskar Jyoti Mahanta shimogo.
1988 batch indang IPS officer Mahanta ya tawa tu Director General of Police (DGP) In-charge inyaktsü shima liasü. Taoba DGP Kuladhar Saikia-i iba menden toktsütsü anogo ka lia Mahanta shim.
Assam sorkar atema additional chief secretary Kumar Sanjay Krishna-i tanü sangdong ka nung “Mahanta-i Director General of Police, Assam inyaktsü atema jenjang ajungketogo” ta metetdaktsü.
Osang angazükba agi, Assam sorkari taoba mapang DGP shimtsü atema Union Public Service Commission (UPSC) dangi senior IPS officers’ tenüng kar agütsü.
Sorkari agütsüba IPS officers rongnung Bhaskar Jyoti Mahanta, AK Sinha Kashyap, KB Singh Deu, BK Mishra aser Mukesh Agarwal nungertem dena liasü.
Bhaskar Jyoti Mahanta ya film yanglu ka lir aser pai Assamese short film ‘Yugadrashta: The Visionary’ direct asü. Iba film ajanga sempet aika nguteta liasü.