Assam sorkari ‘Harijan’ nunger asoshi talidak agütsütsü

Guwahati, November 14 (Agencies) : Assam sorkari ‘Harijan’ nunger nem talidak agütsütsü ta Chief Minister Tarun Gogoi-i Honibarnü metetdaktsü.
Solapara Harijan Housing Colony yanglutsü atema lung azünga yutsüdang Gogoi-i iba osang metetdaktsü.
Chief Minister-isa ashiba agi state sorkari Assam nung aliba Harijan nungertem asoshi talidak yanglutsütsü.
Assam state sorkar ya sensakertem asoshi aria bilemja inyakba sorkar ka lir aser tesüiba küm 14 tashi lokti ajangzüktsü atema mapa jenti inyakogo, ta Gogoi-isa shisem.
“Centre sorkari senotsü ajema kümjaka onoki terenlok mapa maneni inyaktsü. Sensakertem aser lokti nung tangar memenepertem yaritsü atema onoki mapa inyakba manentsü” ta paisa metetdaktsü.
Assam-i ‘India Today State of the States Award’ for Infrastructure Development naroküm angu aser ibaji tanga state tulutem madak anguba liasü. State sorkari gari lenmang, aluyimba, shisaliok, temang anema aliba aser rongsenkettsüng nung temelenshi bener arutsüogo, ta Gogoi-isa ashi.
Paisa ashiba agi, nütsüng yongsük 100,000 indang gari lenmang asadangba nung Assam-i Punjab ajatetogo. Assam nung nütsüng yongsük 100,000 atema gari lenmang kilometer 834 lir aser ibaji Punjab dang nungi asemben agi timba lir.