Assam sorkari Naga yimjung olemtep nung madener

Guwahati, March 23 (Agencies): Assam Chief Minister, Tarun Gogoi-i olemtep nung parnok mejaok ta aijaka, osang kar ajanga Assam sorkari Nagaland sorkar den yimjung olemtep alitsü memulunger, ta metetdaktsü.
R.N. Ravi-i Assam Chief Secretary dang March 18, 2016 nü New Delhi nung asüngdangyatepba senden ka amentsü atema shidi ka ajanga asüngdang, saka Chief Secretary-i interlocutor dangi masü saka home ministry dangi senden amentsü anogo ka lia parnok medentetba osang sangoktsü, ta home ministry nungi osang ka ajanga metetdaktsü.
Assam nung assembly election atema mapa inyakba mapang ka asüba agi parnok senden nung medentettsü, ta Chief Secretary-i home ministry dangi zülu.
Nagaland adener Naga nunger timba ser aliba tesemtem ka küma akümtsüba inyakyim magizüker saka Naga nunger nem yimsüsüba tashi agütsütsü atema kongshia aliba state tem den asüngdangya asütsü nüngdaker, ta home ministry osang ajangasa metetdaktsü.
Nagaland sorkari okadaki moi dang arrtsü indang mangatettepji yimjung aser hai haura kahtepba lemtetnür saka 1989 nung Assam sorkari iba onük Supreme Court nung benokba ajanga iba ken o angatetteptsü mokoki arur, ta tawa tu , Nagaland Chief Minister-i metetdaktsü.