Assam sorkari Sanskrit oshi compulsory kümdaktsütsü lemtetba aikati aitsür

Guwahati, March 02 (Agencies): Assam nung Sanskrit oshi ya Class VIII tashi compulsory subject ka kümdaktsütsü asoshi Cabinet-i telemtetba agiba asoshi state nung opposition aser kaketshir telok balala-i aitsür.
Assam nung aliba kaketreju tem nung Assamese ajungkettsü melen Sanskrit oshi ya compulsory kümdaktsütsü asoshi telemtetba agiba ya All Assam Students Union (AASU)-ia aitsür.
“State board kübok kaketreju tem nung Sanskrit ya compulsory kümdaktsütsü asoshi Cabinet-i lemtetba onoki maitsür, saka tanga state tem nung ama ‘three-language formula’ amshitsü asü ‘four-language formula’ amshitsü, aji sorkari jangjashitsütsüla,” ta AASU nung Chief Advisor, Samujjal Bhattacharya-i ashi.
Assam nung Sanskrit oshi Class VIII tashi compulsory kümdaktsütsü asoshi lemtetba ya RSS headquarter aliba tesem, Nagpur nungi tuyur, ta Asom Jatiyatabadi Yuba Chatra Parishad (AJYCP) telokia aitsür.
“Sorkari tanga state tem nungi Sanskrit sayutsü asoshi tesayur shimtsü sentong atonger, saka onok indang kaketreju tem nung tanga state nungi arua tesayur inyaktsü asoshi onoki memelatsü,” ta AJYCP Tir, Biraj Kumar Talukdar-ia sangdong ka nung ashi.
“Akhi mapang nungi amshia aruba Sanskrit oshi ya state nung kaketreju balala ajanga ajungkettsüla saka iba oshi sayutsü asoshi tesayur peria maliba meteter iba oshi compulsory südaktsütsü lemtetba asoshi tebilemtsü akar,” ta paisa shisem.
“RSS pur ajungmesotsü asoshi Education Minister, Himanta Biswa Sarma-i state nung Sanskrit oshi ya compulsory kümdaktsütsü sentong yanglu,” ta Krishak Mukti Sangram Samiti (KMSS) telok lenir, Akhil Gogoi-ia ashi.
“State nung Sanskrit oshi nung masü saka Assamese oshi ya state board kübok aliba kaketreju ajunga aser Central Board kaketreju ajunga nung amshitsü asoshi sorkari temolung agütsü asübo kanga ajungtsü asü,” ta paisa shisem.
State Board kübok Assam nung aliba kaketreju ajunga nung Sanskrit ya compulsory kümdaktsütsü asoshi Assam Cabinet-i 2017, February 28 nung senden amenba mapang lemtet.