Assam sorkari tribal tesemtem Sixth Schedule nung inoktsü

Guwahati, February 13 (Agencies): Assam nung tribal nisungtem timba aliba tesem ajunga Constitution nung aliba Sixth Schedule-i aitdaktsütsü tebilemba lir, ta Assam sorkari tanü metetdaktsü.
“Onoki iba ken-o ya ketdangser ajunga den tajungtiba nung jembitsü,” ta Parliamentary Affairs Minister, Chandra Mohan Patowary-i Assam Assembly nung metetdaktsü.
Rabha Hasong Autonomous Council kübok aliba tesemtem Sixth Schedule nung dendaktsüba indang ken-o ka, BJP MLA, Dipak Kumar Rabha-i asüngdangba langzüdang Patowary-i iba osang ya metetdaktsü.
“Asenoki tribal nisungtem aliba tesem ya Sixth Schedule nung kanga zübabo meinoktettsü. Asenoki lokti balala aser nüburtem den senden balala agia telemtetba tajung agitsüla. Union Tribal Affairs Ministry, Home Ministry aser iba mesükba ministry balala den angatetteptsüla,” ta Patowary-isa shisem.
Bhumindhar Barman minister asüba mapang züngsem trok-i akümba cabinet sub-committee ajanga Rabha tesem ya Sixth Schedule kübok inoktsü asoshi agizüka lir, ta paisa shisem.