Assam: SPO temi Saraighat apu nung longkak ait

Guwahati, Rongchii 24 (Agencies): Tentonü special police officers (SPOs) telok kati parnok mapa permanent kümjanga, ta khanga Saraighat apu nung longkak ait.
Longkak aitertemi Brahmaputra ayong nung pongokja soseta asütsü dena merangdangogo koba police aser CRPF sepai temi tashiyim dena amshia nokdangtsüsa aküm.
Special Police Officers’ Welfare Society secretary Mrityunjay Bora-i ashiba agi, police temi lathi agi azükba nung longkak aiter parnok 12 tashi yiruogo. Paisa ashiba agi Darrang district nungi SPO Tankeswar Baruah indang teka tachichi police temi azükba mapang nung raksaogo.
SPO parnok 250 dak temai tamasa Kachari nung Brahmaputra tzüküm nung adenshi, saka police temi parnok nokdangba sülen parnok Saraighat apu tonga ao.
Longkak aitertemi sorkar anema yimyim balala ayima senzü aser police temi parnok meyoktsü asoshi tenokdangba yuja aliba sodanga or ayong nung pngoktsütsüba atema railing-i soketa tuya aliba mapang nung police temi parnok dak azük tenzük.
Kamrup (metro) additional deputy commissioner Pulak Mahanta iba tesemi ao aser longkak aiter SPO tem den sensaksema liasü.
“Mahanta-i additional chief secretary, home, Alok Kumar densema onok den senden ka akatsüba atema jaok saka onoki iba ya thitsüogo kechiyong onok home department ketdangsertem den senden aiben menogo saka kecha tajangzük maka,” ta Bora-i ashi.
“Onoki chief minister Sarbananda Sonowal den senden ka akatsüba atema khangogo aser Mahanta-i onok temepishiba mulunga agizükba ajanga onoki longkak ait anen. Iba senden ya Monupii (May) 5 nü tashi nung mejatepra onoki Guwahati nung lokti soseta asüba sentong ka ayongzüka akatsü,” ta paisa ashi.
West Guwahati police deputy commissioner Bhanwar Lal Meena-i ashiba agi, police temi parnok dak lathi agi mazüka saka longkak aitertem aser police tsüngda tera mepetmesü adoka liasü.
State sorkari 2008 küm SPO parnok 900 shi mapa nung temporary basis nung aniokogo. Parnok nem ita nung sen 4,839 fixed nung agüja telungpuri minprongba district 11 nung mapa agütsü. Iba sülen itasen yanglushia sen 8,200 kümtsü. Parnok ya tongtiba ki aser tesemtem anüktsü asoshi toktsü, ajisüaka parnok mapa ya 2015 küm aginogo.
Parnoki tang SPO ajak ya Assam Industrial Security Force mesera state police department kübok mapa tazüng alibatem nung anioktsü asoshi akahanger.