Assam sülen Bihar assembly nunga GST bill agizükogo

Patna, August 16 (Agencies): Assam assembly nung GST Bill agizükba sülen Mongolbarnü Bihar assembly nunga chief minister, Nitish Kumar-i GST bill tajangzüktem metetdaktsüba sülen GST Constitution Amendment Bill agizükogo.
Assembly nung jembidang Kumar-i, GST nung tajangzük aika lir, ta metetdaktsü.
JD(U) National Tir Kumar-isa, tetenzük nungi par party-i GST Bill pusema liasü aser ibaji tawa pai Union finance minister, Arun Jaitley nema metetdaktsüogo, ta ashi.
CPI(ML) MLA-i iba Bill ji anema senden nungi ayazüka alu. Ajisüaka JD(U), RJD, Congress aser BJP-i GST pusemba ajanga Bihar nung iba ozüng agizükogo.
Taoba Hokolbarnü Assam nung mezüng GST agizükba sülen NDA nung madenba sorkar kati iba Bill agizükba mezüngbubaji Bihar kümogo.
Constitution (122nd Amendment) GST Bill 2014 ya Lok Sabha aser Rajya Sabha naprongla nung agizükogo.
Assam assembly nung GST Constitution Amendment Bill ya ajaki melunga agizüka liasü.
Iba mapang nung osangbenertem den jembidang Assam Chief Minister, Sarbananda Sonowal-i, “GST constitutional amendment bill mezüngbuba agizükba state ji Assam ta bilemtettsü,” ta ashi.
Assam nung opposition Congress aser AIUDF MLA temi iba Bill pusemaka parnoki, GST ajanga Assam koma kongshitsü, ibaji mezüng o lemteptsüla ta mepishi, ajisüaka Speaker-i ibaji magizük.
Constitution (One Hundred & Twenty Second Amendment) Bill, 2014 agizükba sülen  Assembly Speaker, Dass aser Finance Minister Himanta Biswa Sarma na nanglong lemsatepa achi.