Assam süngolu nung tetsür ka tashiyim agi raksatsür tepset

Silchar, Monupii (May) 7 (Agencies): Cachar district kübok Arkatipur Tea Estate nung nung arishi küm 20 tain tetsür ka dak tebur telok kati tashiyim agi shi nung medemba sülen tepset.
Tetsürlaji Monupii (May) 2 nü sama aser tasüngji tebui Udharband police station nung nisung samaba ken o ka benok, ta police ketdangser kati ashi.
Küptoknü (Honibar) süngolu nung mapa inyakertemi tetsür indang tasümang ka angu. Süngodong ka anasa mangji shir liasü. Iba osang prokshia jembiba angashia tetsürla tebu tesem tonga oa reprangdangdang, mangji lar jala indang liasü ta ajitet.
Tetsürla indang mangji Silchar Medical College Hospital nung post-mortem asütsü atema bener ogo.
“Küptonük (Honibar) tetsürla tebui Udharband police station nung FIR ka benok aser iba nung lar jala tepsetba atema nisung pezü dak tai tongloktsü. IPC nung Arrla 366, 376, 302 aser 34 kübok parnok dak tai tonglokja lir” ta Cachar SP Rakesh Raushan-i ashi.
Police-i nisung pezüji puogo aser parnokji Chappanahaal tea garden nung alir Sumra Karmakar/Nunu (20), Raju Santhal (20) aser Sajan Rikiason (28) den Elgin Tea Estate nung alir Gupta Rikiason (19) nungertem lir, ta police superintendent-isa metetdaktsü.
Okadak kati par pezü anogo pungunü police ket nung ayutsü atema temelaba agütsüogo aser parnok dang asüngdangya südar, ta Raushan-isa shisem.