Assam, Tinsukia nung light yindong laoa nisung 11 asü

Tinsukia (Assam), April 11 (Agencies): Hombarnü Assam, Tinsukia district kübok Pengiri nung telok ka lungkak aitdang light yindong laoa light süngzü agi kongshiba lendong nungi nisung ter asü aser nisung 20 yiru.
Lungkak aitertemi nok aser süng bener police station telungi ia ozüng alema mapa inyakdang parnok senshidaktsütsü atema police-i injang kahdok. Anogo asem tejaklen iba tesem nung nisung ana tepsetertemji parnok ket nung agüjang ta lungkak aitertemi takhangba agüja lungkak ait, ta police-i ashi.
Lungkak aitertem senshidaktsütsü atema police-i anünglen injang kahtokdang light yindong ka nung kashhiba sülen yindongji laoa light süngzü jagi lungkak aitertem dak kongshia nisung tuku iba tesem nungjisa puseta asü aser nisung ana Tinsukia Civil Hospital nung asü. Ano lungkak aiter karbo injang agi yirua lir.
State police, Director General Mukesh Sahay-i, “Loktii parnok mulungba agi idangyongjisa obendang agütsütsüji police-i menokdangi melitet. Ibayongji onoki injang yoktsüsa aküm. Onoki anünglen aser lungkak aitertem naprong dak injang kahloktsü, kechiyong tensaji mazüokteti aküm,” ta ashi.
Tongti ketdangsertemi central paramilitary sepaitem aser police tem den iba tesem jagi oa tensa azüoktsü meranga lungkak aitertem den senden ka amen, ta police-i ashi.
Anogo asem tejaklen kibong ka nungi nisung asem- tebu, jabaso aser jabaso kinungtsü nunger apuba sülen jabasoji jena otet, aser tesülen tasümang anaji angu. Iba ken o nung nisung pongu pua lir, ta police-isa metetdaktsü.

PM Modi aser Home Minister Rajnath nati asüko osang lemsa
Iba osang angashia tanü Ato kilonser Narendra Modi-i asüko osang lemsaba den külemi Home Minister, Rajnath Singh dang nüngdakba mera agitsü tuyuogo.
Home minister, Singh-i Assam Chief Minister, Tarun Gogoi dangi phone süa tensa indang osang metetpelaogo.
Ato kilonser office nungi twitter ajanga, “Assam, Tinsukia district nung light yindong laoba ajanga nisung asüba atema PM @narendramodi-i asüko osang lemsar ,” ta ashi.
Ano tanga twitter osang ka ajanga, “Yirua alirtem tekaraba nung ajungtsü PM-i sarasademtsür. PM-i Home Minister @BJPRajnathSingh den iba tensa indang jembiogo,” ta ashi.
Ano Home Minister Office sangdong ka ajanga, Singh-i Gogoi den jembiogo, shibai iba tensa indang metetdaktsü. “Tensa azüokteta aliba osang lir,” ta ashi.
Kasa osang ajanga, “HM-i asür kibongtem den asüko osang lemsatepogo aser yirua alirtem atema sarasademtsüogo,” ta ashi.