Assam tsür Priyadarshini Miss World nung shilem agidar

Guwahati, December 03 (Agencies) : Assam tsür Priyadarshini tang Washington DC nung Miss World beauty pageant 2016 tetoktepba nung shilem agidar.
Miss World final ji December 18, 2016 nü agitsü aser yangji alima balala nungi tetokteper ajak agi parnok kongrolar 119 tashii shilem agitsü.
Tang ya People’s Choice Award atema vote agitepba mapang lir aser iba telemsa nung takok angulaji kecha tetsükdaktsü makai top 10 rongi aitsü.
Priyadarshini Chatterjee ya FBB Femina Miss India 2016 nung takok angu aser North East nungi linük tenüng nung Miss World atema shilem agilaji la mezüng lir.
La iba tetoktepba atema renemshiba indang TNT den interview ka nung jembidang lia, “Linük tenüng nung Miss World tetoktepba nung shilem agitsüji mapa tulu lir, ajisüaka ni iba ya maongka ka aser takok tulu ka amai züngshir,” ta ashi.
Miss World official portal nung Priyadarshini indang video ka ajanga linük rangben nema tangteter.
Assam aser Northeast India nung alir ajaki la takok angutsü kanga yongyaseta atar.
Nüburtemi vote asüba December 18, 2016 nikongdang 7.30 ako nung tembangtsü. Anungji asenokia asen shilem inyaka la nem vote agüja la nungitdi.