Assam: Tzümetsüng agi yimtsüng ka metsüngbang

Dhubri, Chiteni/July 25 (Agencies): Assam, Dhubri district kübok Bilasipara sub-division nung taoba mapang tzümetsüng agi memetsüngi aliba tesemtem metsüngbangba sülen tensa tamajungba kümogo.
Taoba ghonda 48 tsüngda tzünglu kanga sashia aruba sülen district nung tzümetsüng tensa tamajungba aküm.
State Disaster Response Force (SDRF) aser National Disaster Response Force (NDRF) sentepa tekümzükba maparen inyakba mapang Bilasipara sub-division nung nisung 500 shi kümzüka tekümzükdaki anirogo.
Iba district kübok yimtsüng 400 dak tema tzü agi metsünga lir aser block ti nung aliba nisung 32,000 dak tema relief camp balala nung jenoka lir.
Dhubri District Disaster Management Authority (DDMA)-i ashiba agi, tang ano tzümetsüng ajanga district kübok yimtsüng 100 dak tema metsüngbangogo.
Dhubri district dak alia tzümetsüng ajanga kidanger Kokrajhar district nunga July 23 nü nungi tenzüka yimtsüng tasen aika metsüngbangogo.
Dhubri nung Brahmaputra ayong nung lendong temaitsü agütsür aliba metre 28.62 tongogo.
Water resource department sangdong ka ajanga ashiba agi, Brahmaputra ayong nung tzü level timba akümtsü imlar.
Gauranga aser Bilasipara ayonga nunga lendong temaitsü agüja aliba aden tzü yimdar aser tzümetsüng ajanga yimtsüng tasen aika metsüngbangba den National Highway 31 dena metsüngbangogo.
Kümdangshia alitsü atema Dhubri district administration-i Bilasipara nung Sankosh apu anasa NH 31 nung gari tulu mesenzütsü asoshi tetuyuba agütsüogo.
Dhubri deputy commissioner Ananta Lal Gyani-i Bilasipara sub-division semdanga tensa asadangogo.
DDMA sangdong ajanga ashiba agi, district den sendaktepba lenmang tongtibang 16 rongnung tesem kar nung apongtokogo aser kar metsüngbanger lir.
Osang ajanga ashiba agi, tekümzükba maparen balala inyakba mapang tzümetsüng agi kongshir aliba nisung 506 kümzüka anirogo.
Tzümetsüng agi kongshir alir 362 rongnung tebur 73, tetsür 113 aser tanur 140 Abirkuthi aser Futkibari nungi Simlabari-i anirogo.
Maneni tebur 25, tetsür 30 aser tanur 18 densema nisung 73 Lokhiganj anasa Alengmari tesem nungi LakIganj PWD Road-i anirogo.
Osang ajangsa Udmari Gaon Panchayat kübok Namabarshi tesem nungi Tilabarshi tashi nisung 59 anirogo.
Kasa mapang nung Gaurang apu anasa aliba Diabari aser Hakama tesem nungi nisung 48, (tebur 14, tetsür 14, tanur 20) Hakama nung NH-31-i anirogo.