Assam tzümetsüng ajanga nisung lakh 2 kongshiogo

Guwahati, July 17 (Agencies): Assam nung aliba district 13 nungi nisung lakh ana jungnüa tzümetsüng agi kongshiogo aser Tinsukia o Sonitpur district na nung tejenokdak semtu balala nung nisung 200 dak tema jenoka lir, ta ketdangsertemi ashi.
Mongolbar nungi tenzüka state tesem aika nung tzünglu sashia arur aser tzümetsüng agi Baksa, Dibrugarh aser Kamrup district tem kongshiogo, iba den külemi Barpeta, Sonitpur, Dhemaji, Lakhimpur, Tinsukia, Darrang, Nalbari, Golapara, Jorhat aser Kamrup (Metro) district tem nung aliba yimtsüng aika nung tzü metsünga lir.
Assam State Disaster Management Authority (ASDMA) osang ajanga ashiba agi, yimtsüng 533 nung tzü metsünga nisung 1,95,243 tzümetsüng agi kongshia lir.
State Emergency Operation Centre atema state sorkari toll free phone number– 1070 aser District Emergency Operation Centre atema phone number 1077 tenzüktsüogo. Tzümetsüng ajanga ali hectare 8,245 nung tsünüba aonsotsü raksatsüogo, ta ketdangsertemi ashi.
Bodhbar nü Revenue & Disaster Management Minister Bhumidhar Barman aser Water Resource Minister Basanta Das nati tzümetsüng tensa reprangshima liasü aser district administration dang nüngdakba meratem agitsü tuyuogo.
Minister anatisa district ketdangsertem dang nüngdakba chiyungtsü aser teyari oset agütsütsü tuyuogo.