Assam tzümetsüng nung nisung 4 asü

Guwahati, July 29 (Agencies): Assam nung tzümetsüng ajanga lendong balala atalokdang July 29 nü nisung pezü süogo. Tanü asürtem dena tang tashi nung iba timtem ajanga nisung 86 taküm samaogo.
Assam State Disaster Management Authority-i anogoshi osang agütsüba nung Assam kübok district 33 kübok 16 nung nisung lakh 12.24 shi timtemer.
National Disaster Response Force (NDRF)-i tenemzük tesemtem nung alirtem relief camps-i anir aoer aser Centre-ia akokba tashi yaritsü nangzüka lir.
Tang tashi nung nisung 14,727 tashi relief camp 322 nung jenoka lir. District 16 kübok yimtsüng 1,113 nung nisung 12,24,685 tashi timtemer.
Assam Forest Department indang Brand Ambassador Ananda Khataniar-ia Chief Minister’s Relief Fund nem Rs 25,000 tenla agütsüogo. Maneni, Minister Sum Ronghang, MLA Prasanta Phukan aser MLA Suren Phukan nungertemia CMRF nem tenlaogo.
Ajak dang tamajungtiba kongshia aliba district ji Barpeta lir. Iba district nung nisung 8,19,077 timtemer.
Tzü mesemi ayimba ayongtemji Neamatighat (Jorhat) aser Dhubri nung Brahmaputra, N T Road Crossing (Sonitpur) aser Kushiara, Karimganj nung Jia Bharali lir, ta ASDMA-i metetdaktsüogo.