Assam tzümetsüng nung nisung lakh 1 tema timtemer

Guwahati, July 9 (Agencies) : Taoba anogo ishika tsüngda Assam nung tzünglu kanga aruba ajanga district tenet nung tzümetsüng timtem ajurua lir aser iba nung nisung lakh ka den tema timtemer, ta Honibarnü ketdangser kati ashi.
Lakhimpur, Nagaon, Golaghat, Morigaon, Biswanath, Barpeta aser Jorhat district tem kübok yimtsüng 213 nung nisung 112,307 tashi tzümetsüng agi kongshia lir, ta Assam State Disaster Management Authority ketdangseri ashi.
State meteorological department-i Assam aser tanga north east state tem nung taruba anogotem nunga tzünglu arutsü ta tetzüa lir aser ibaji ajanga tzümetsüng timtem tuluba akümtsü akok, ta paisa shisem.
“Jorhat, Golaghat aser Lakhimpur district tem nung timtem tuluba ajurua lir aser item district nung district administration-i relief camp 6 lapokogo” ta ketdangserisa ashi.
Neematighat (Jorhat district) aser Dhubri district nung Brahmaputra ayong nung tzü danger level nung ayimer. Ano, Sivsagar nung Dikhow ayong aser Golaghat o Numaligarh nunga Dhansiri ayong nunga tzü mesema yimdar.
Külen, Majuli river Island nunga ali anenzüka aoba osang angazüker. Yimtsüng aika nung tzümetsüng aremogo saka yimdaklirtemi ali anenzüka aotsü tsübur. Jorhat nung district administration-i rescue operations atema army teyari meshiogo.

You must be logged in to post a comment Login