Assam tzümetsüng nung nisung lakh 2 timtemer

Guwahati, August 19 (Agencies) : Tesüiba anogo ishika Assam nung tzünglu kanga aruba ajanga Bodbar tashi nungbo tzümetsüng timtem kanga mejungi kümogo aser yim 280 den timba nung nisung lakh ana shi timtemer.
Dhemaji, Kokrajhar, Chirang, Lakhimpur, Bongaigaon, Tinsukia aser Dibrugarh district tem nung yim 282 nung nisung lakh 2 shi tzümetsüng ajanga timtemer, ta Assam State Disaster Management Authority (ASDMA)-i osang metetdaktsü.
Tzümetsüng agi kanga mejungi kongshiba tesemji Bongaigaon district lir aser iba district nung nisung lakh 1.35 shi timtemer. Iba sülen Dhemaji district nung nisung meyirjang 20 shi timtemer. Tzümetsüng ajanga ali tasazük hectare 12,600 shi ka nung tsünüsenbongtsü raksatsüogo, ta parnokisa ashi.
State ketdangsertemi Kokrajhar, Bongaigaon aser Chirang nung relief camp 45 lapokogo aser item nung nisung 17,500 shi jenoka lir.
Tzümetsüng ajanga Kokrajhar, Chirang aser Dhemaji district tem nung gari lenmang 11 tashi raksatsüogo aser Chirang o Dhemaji nung tzü noktangba pezü tashi raksaogo, ta tanü ASDMA-isa metetdaktsü.
Taküm Assam tzümetsüng lendong nung nisung pungu süogo aser parnokji Lakhimpur nung ana aser Bongaigaon, Baksa o Sonitpur nung ka ka liasü, ta parnokisa shisem.