Assam ya NE nung petroleum angudak tiyongtsü ka akümtsü

Guwahati, June 24 (Agencies): Hokolbarnü Guwahati nung osangbenertem senden ka nung Union Minister of State for Petroleum & Natural Gas, Dharmendra Pradhan-i, ministry-i Assam ya Bhutan, Bangladesh aser Myanmar atema petroleum products tiyongtsü ka kümdaktsütsü meranger, ta metetdaktsü.
2030 küm tashi nung ministry-i iba sector nung sen crore 1,30,000 intoktsü sentong aliba metetdaktsüdang Pradhan-i, “Iba sen nungi sen crore 80,000 bo Assam nung intoktsü,” ta metetdaktsü.
Tan financial year nung state nung sen crore 6,000 crore intoktsü sentong yangluogo, ta paisa shisem.
Osangbenertem senden nung Assam Chief Minister, Sarbananda Sonowal aser state Industry Minister, Chandra Mohan Patowary nata liasü.
Pradhan-isa, “Bangladesh, Bhutan aser Myanmar linüktem nem nüngdakbatem agütsütettsü atema Assam aser northeast ya petroleum products tiyongtsü ka kümdaktsütsüji onok sentong lir,” ta ashi.
“Assam densema northeast tesem ajak ya hydrocarbon tiyongtsü ka kümdaktsütsü onok sentong lir. Sen intoktsü sentong nung state nung aliba refinery pezü- Digboi refinery, Guwahati refinery, Bongaigaon refinery aser Numaligarh refinery tem densema lir,” ta Pradhan-i metetdaktsü.
Union minister-isa ashiba agi, sorkari linük nung oilfield tila 67 jangjateta lir aser item rongnung Assam nung 12 lir.
“Onoki ibaji ti küma lemsaogo aser taküm July ita tom nungi tenzüka item oilfield tila contract nung agütsütsü atema maparen tenzüktsü,” ta paisa shisem.