Assam:Küm 16 nung kendok 239 tepsetogo

Guwahati, July 21 (Agencies) : Ozüng alema shiruru tepsetertemi Assam nung küm 16 tsüngda nung kendok 239 tashi tepsetogo, ta tanü Brihostibarnü Forest Minister Pramila Rani Brahma-i metetdaktsü.
Assembly nung Congress MLA Ajanta Neog-i asüngba langzüa Brahma-i, 2001 küm nungi tang tashi nung ozüng alema shiruru tepsetertemi state nung kendok 239 tepsetogo, ta ashi.
“Arem reprangertem nüngdakba oset shitak magütsür. Transit camp tem ajak shizükaogo. Ita shia parnok nem agütsüba chiyungtsü (ration) mapang shitak nung magütsür. Parnok nem chiyungtsü küm nung khen mesüra anaben dang agütsür, ta lai ashi.
Lai, “Department-i arem reprangtsü nübu yua lir, ajisüaka parnok ita sen mapang shitak nung magütsür. Parnok uniform atema sen bo lemzükja lir saka parnoki mangur…süra parnok koma taküm alitsü? Onoki shiruru tepsetba anendaktsünüba agi ni iba tebilemtsü ya chief minister dena lemsatepogo,” ta Brahma-i ashi.
.303 rifle tem ya joko kanga tejen aser item prangpong atema injanga peria magütsür, ta lai shisem.
“Item oset ya tanü asüng tensa den peta melentsütsüla. Transit camp tajung den unifom, tsüngsem aser nüngdakba tapu ajak shitak agütsütsüla.
Ozüng alema shiruru tepsetba anendaktsütsüji kü nükjidong mezüngbuba lir, ajisüaka ibai nokdangtsüji temela masü,” ta ashidang Brahma-i, kendok tezü nung mozü keta aliba ajanga alima rangben nung ozüng alema iba shiruru tepsetteper, ta shisem.
Assam nung kendok tezü ka nung sen lakh 1.5 tema agi ayoker aser koda international arrtsü ajangdir iba jenjang dang tali agi ayoker. Myanmar nung iba tezü ka nung sen crore 2 aser China nung sen crore 3 agi yokteper. Anungji iba inyakyim meraksatsü tashibo ozüng alema shiruru tepsetba menokdangtettsü, ta minister-i ashi.
2001 nungi tang tashi nung ozüng alema shiruru tepseter parnok nisung 705 jangjaogo aser parnok rongnung nisung 661 pua lir, ta lai Assembly nung metetdaktsü.
Congress MLA Rakibul Hussain-i asenok o asenok na tai tongtepa makazüi party aser lokti ajaki ozüng alema kendok tepsetertem anema tashi itta nokdaktsü ayongzük.
Sorkar mapa inyakertem den police dena ozüng alema shiruru tepsetba inyakyim nung dena lir ta BJP MLA Padma Hazarika-i ashi ajisüaka iba dak sentakba nung ano kuli tejangja kecha nguteta mali, ta Brahma-i ashi.
Lai, video ajanga iba mapa tamajung inyaker aputsü atema inyakyim ka memunui  tenzüktsü aser state nung aliba kendok tezü ajak au süng agi yangluba asü shitakba, ibaji metettsü atema kanga junga asadanga bushitsü, ta ashi.