Assembly election agitsü memelatsü: Naga Hoho

Guwahati, Aenjeti (January) 20 (Agencies): Nagaland nung taruba Assembly election Tsüklai (February) 27, 2018 nü agitsü sangdonga lir, ajisüaka junga magitettsüa akok, ta Küpdoknü (Honibar) state nung tribal tongti tentet, Naga Hoho-i metetdaktsü.
Tanü Guwahati nung osangbener den jembidang Naga Hoho Tir, Chuba Ozukum-i, “Election nung shilem magitsü atema onoki tang tashi nungbo telemtetba magi, ajisüaka onoki ibaji memelatsü,” ta metetdaktsü.
Centre sorkari nübur ola mangai Naga yimtenren onük melatet, saka parnoki state nung election agitsü atema sangdongba sülen Naga Hoho Tiri iba osang metetdaktsüogo.
Tesüiba ita ishika Naga nungeri election masü saka Naga yimtenren onük latettsü atema ola adoka takhangba agüja arudar.
Chuba Ozukum-isa, “Menden (Ato kilonser) agizükba sülen pai (Narendra Modi) onok dang iba onük ya ita 15 tsüngda latettsü ta nangzük. Iba sülen parnoki (Centre) Assam aser Manipur nung election magi tashibo ibaji melattettsü ta ashi. Anungji onoki aremzüka ataogo. Küm asem süiadokogo, aser iba mapang nung BJP-i Assam, Manipur aser Arunachal Pradesh nunga sorkar akum. Nagaland Assembly kümsük tatembang kati arur, anungji yimtenren onük latettsü atema iba ya mapang tajungtiba asütsü ta onoki bilem, ajisüaka sorkari election agitsü atema lemtetba ajanga Naga nunger ashioktsüogo. Parnok mapa ajanga parnoki süoki ia meinyakba atema onoki tasüngdangba akatsüsa akumer,” ta metetdaktsü.
“Naga nunger lokti tentettem, tribe ajak, yimtenren party tem aser tang teinyakdak MLA temi parnoki election masü saka yimtenren onük latetner ta shiogo. Tang sorkari election agitsü atema inyaker, aji oda inyakang, ajisüaka candidates melira kodaser election agitettsü?” ta pai asüngdang.
Chuba Ozukum-isa, Naga Hoho-i yimtenren party tem dang candidate tem moktepdaktsütsü atema asüngdangtsü, ta ashi.
1998 küm state Assembly election nung shilem magitsü lemtet, ajisüaka iba mapang nung ruling party Congress den Independent candidates kari toktepa liasü. Iba election nung Congress-i menden 60 nungi menden 53 nung takok angu aser tanüngba menden 7 ji Independent candidates-i angu.
Iba dak sendakba nung Naga Hoho Tiri, 1998 küm indang tensaji balaka liasü, ta ashi.
“Iba mapang nung election ji (1998 küm) Naga Hoho, NSF, NSCN-IM (Isak-Muivah) aser party kari dang yimtenren onük latettsü atema takhangba agüja shilem magi. Ajisüaka tangbo yimtenren party ajak aser Naga nunger ajaki election anema nokdaker,” ta paisa shisem.