Assembly mapang Kma nung traffic ozüngtem sangdonger

Kohima, May 25 (TYO): May 27, 2017 nü 12buba Nagaland Legislative Assembly 16buba (Special) senden nung ajemdaker security maparen dak sendakba nung traffic ozüngtem melenshiba osang ka Sr. Superintendent of Police Kohima, Nagaland ajanga metetdaktsüogo.
1. Car passes aliba garitem dang Assembly Secretariat telungi aittsü melatsü.
2. Assembly agiba mapang nung anepdang 6:00 ako nungibo tsünglanglen aliba gari lenmangtem tezülen gari anena ayutsü memelatsü:
(a). BSNL Telephone Exchange nungi Classic Island tashi.
(b). Raj Bhavan nungi M.S Classic Island tashi.
(c). Classic Island nungi Razhü Point adena Assembly Secretariat tashi.
3. Assembly agiba mapang sorkar department bus tem dak alaka gari tulutem High School junction nungi Sanuoru subway adena Assembly Secretariat tashi senzütsü memelatsü.
4. Anepdang 7:00 ako nungi tenzüka Assembly senden matem tashi Kohima jila nung gari tulutem senzütsü memelatsü. Kohima jila nung gari tulutem nungi khu loading aser unloading ji anepdang 7:00 ako tashi nungbosa tembanga inyaktsüla.
5. Gari tulutem “D” Block road nung anena ayutsü memelatsü.
Nüburtemi amalitepa inyaktsü imlar, iba den külemi ozüng alema inyakba garitemji police-i atsüer aotsü aser gari kiburtemi senchi agütsütsüsa akümtsü, ta kasa sangdong ajangasa metetdaktsü.