Assembly nung Naga yimtenren onük aser Lokayukta Bill benok

Kohima, December 14 (TYO): Naga people’s Front party telung sasep nung mepetmesü liaka 12 buba Nagaland Legislative Assembly (NLA) 19 buba senden tanü Kohima nung tenzükogo; 12buba NLA atema anogo ananü senden ya tatembangbuba senden asütsü, kechiyong parnok kümsük sangküm March ita nung tembangtsü aser February ita nung election agitsüa akok.
Asükwa mongpu assembly senden mezüngnü, yashi cabinet nungi anentsüba züngsem ana Tohkheho Yepthomi aser Y Patton na den Rural Development Minitser, E E Pangteang aser DAN Chairman, Dr Shurhozelie Liezietsu nunger maden; tanü senden minute 31 mena liasü.
Question Hour mapang nung public welfare dak sendakba tasüngdangba kecha maliasü, iba sülen Chief Minister, T R Zeliang-i Nagaland Public Service Commission indang 2015-16 küm indang 50th annual report aser 2016-17 küm indang 51th report agütsü. Paisa Nagaland Information Commission indang annual report 2015-16 aser report 2016-17 den Nagaland School Education Service Rules 2017 benok.
Chief Minister-isa Nagaland Khadi aser Village Industries Board (2011-12 nungi 2014-15) dak sendakba Comptroller and Auditor General of India indang audit report benok.
Parliamentary Secretary, Vikho-o Yhoshu-i Nagaland State Mineral Development Corporation Limited indang annual report 2014-15 benok.
Transport & Civil Aviation Parliamentary Secretary, P. Paiwang Konyak-i Nagaland Essential Services (Maintenance) Act, 1978 (First Amendment) Bill 2017 benoka liasü aser iba bill atema Hokolbarnü o lemteptsü.
Lokti tentet balalai akhangba nung ajemdaker sorkari tentetba Select Committee Chairman, PWD (Housing) Parliamentary Secretary, Levi Rengma-i Committee on the Nagaland Lokayukta Bill 2015 osang metetdaktsü.
Taküm küm tetenzüklen Urban local bodies nung tetsürtem atema menden wazüka yutsüba onük nung longkak aitdang nisung asem tashi asü, aika yiru, iba den külemi sorkar kiojen aika rongdoka liasü, aser maneni tanü assembly nunga o lemteptsü atema iba onük benok. Ajisüaka tanbo CM-i 2016 küm November 24 nü Urban local bodies nung tetsürtem nem menden wazüka yutsütsü atema agizükba bangzüng agientsü atema bangzüng tasen ka benok.
Zeliang-isa Naga yimtenren onük dak sendakba nung bangzüng ka benok; iba bangzüng ajanga India sorkar dang 2018 küm state assembly election magidangyongi ajaki agizüktettsüsa Naga yimtenren onük latettsü asoshi mera agia inyaktsü mepishi.
Kasa bangzüng ajangasa Election Commission of India (ECI) danga, ajaki agizüktettsüsa Centre sorkari Naga yimtenren onük melatettsü tashi 13buba State Assembly election atema mesangdongi alitsü mepishir.
Iba bangzüng ajanga Assembly-i lokti tentettem, tribal hohos, Arogo aser tanga lokti tentettem dang iba dak sendakba nung state sorkar den amalitepa inyaktsü ajungshiba den külemi yimtenren party ajak aser Independent candidates ajak dang election matongdang Naga yimtenren onük latettsü asoshi akhangtsüla, koba ajanga Centre aser Election Commission dang Naga nunger telongjem sayutsü ayongzüker.
Ajisüaka NLA Speaker-i, Lokayukta Bill aser Women Reservation den Naga yimtenren onük indang bangzüng atema asüng ang o lemteptsü, ta metetdaktsü.