Assembly sülen ang ministry melentsü: CM

Kohima, December 14 (TYO): Brihostibarnü Nagaland Chief Minister, T R Zeliang-i, State Assembly senden tembangba sülen ang par ministry melentsü, ta metetdaktsü.
Tanü Assembly Secretariat nung pa indang office kima osangbenertem den jembidang T R Zeliang-i, “Onoki ministry melentsü atema bilema maliasü, ajisüaka yasüng cabinet minister pezü menden nungi anentsüba sülen minister tem tasen shimtsü, saka Assembly senden tembangba sülen ang shimtsü,” ta metetdaktsü.
December 09, 2017 nü T R Zeliang aser Dr Shurhozelie Liezietsu-i aniba NPF na longjemtsü atema tezüngzüktep ka agiba sülen yashi MLA kar Lok Sabha MP, Neiphiu Rio den aden, ta osang angazüker.
Iba sülen yasüng tesü T R Zeliang-i Cabinet Minister pezü – Y Patton, Tokheho Yepthomi, Dr Neikiesalie Nicky Kire aser Neiba Kronu nunger cabinet menden nungi anentsü, ajisüaka parnok melen minister tasen meshim.
Ano külen Raj Bhavan telung osang ka ajanga ashiba agi, State Angh sentong aika nung kanga mazüngi lir, anungji December 16 sülen ang cabinet minister tasentem shimtsüa akok.