ASTD-i ACAUT purtemi inyakba nungiter

Dimapur, July 07 (TYO) : Democracy nung nübortem olaji tongtibangtiba, anungji nübortemi adokba olaji government-i angatsüla aser parnok nüngdakji inyaktsütsüla ta tanü Brehostibar nü Ao Senso Telongjem Dimapur sangdong ka nung metetdaktsüogo.
Tawa Dimapur nung gari totzü den kerosene meyokteper ayokba mapatem ACAUT teloki putetba maparen nung  ASTD-ia nungiter aser tatem tashi bushitsüla ta sangdongba osang ka nung iba ken o ya  metetdaktsü.
Tang amai nübortemi tim masüba mapa anema ola adoker saka iba olaji government-i mangashir ta asübaji democracy asoshi maksü anguba anogo asütsü ta  ASTD-isa metetdaktsü.
ACAUT teloki Dimapur district administration  dena lia gari totzü nung kerosene meyokteper ayokba mapatem puteta agütsüba sülena government tsütsü ola madokbaji tesüngmangtsüka lir ta ASTD-isa metetdaktsü.
Takar aser sensaker ajak azübo kasadang aser gari totzü nüngdakbaji ajak atema kasasa nüngdaker. Aji oda, nübortem akoksatsüsa ashioktsü dang nübortemi adokba olaji mangashi amai toktsüra, state  nung temzüng ozüng amshir kong lir ? Iba ama ashikülakertem ket nungi shibai kümzüktsü ? Shibabo ochiobendang angutsü ? Kechiba yimten nung nübortem asoshi khuret bena inyaktsü shimba purtemi ola madoker (?) ta ASTD teloki kanga jashia metetdaktsü.
Nagaland nung gari lenmang kanga majung aser ano yangji senzütsüba garitem nung petrol aser diesel enoktsü melen kerosene enoker jajara gari nung kechi ataloktsü ? Iba ama ashikülak ya tang menokdangra, item mapa tamajung inyakertemi Nagaland rongsen ajak agiadoktsü ta ASTD-isa shisabolua bilemba ken o ka metetdaktsü.
Memenuisa state government-i meshitak aser ozüng raksartem pur tim teinyaktsü inyaktsüla ta ASTD-isa takangba ka agütsüogo. “Nagaland nung ACAUT teloki lendong timtem ajak tizükteta  inyakba ngua parnok nem tenüngsang agütsür,” ta ASTD sangdong nung ASTD tir Wb.Supu Jamir aser tongti zülur Wb.Onen Walling nati ajangajanga metetdaktsüogo.