ASTD-i Dr. S.C Jamir nem tenüngsang agütsür

Dimapur, January 29 (TYO): Ao Senso Telongjem Dimapur (ASTD) nung züngsem tajung taoba Chief Minister aser Governor Dr. S.C Jamir-i Padma Bhushan Award anguba atema tenüngsang agütsüba den pelaba osang metetdaktsüogo.
71 buba Republic Day nü India Tiri Dr. S.C Jamir nem iba sempet agütsüba ajanga Aor asoshi dang masü saka Naga nunger asoshi konang tetushi bentsür aruogo, ta ASTD-i ashi.
Dr. S.C Jamir ya Naga yimten maparen tetenzükertem rongnung ka lir aser 1960 küm 16 Point Agreement nung sign asürtem rongnung pa dang taküm lir. Nagaland state kümtetba sülen nungi pai public tenzükba wadang nung mapa tulu inyakba atema iba tetushi agütsüba ya kanga tim lir, ta ASTD Tir L. Wati Jamir aser Tezülur K. Mar Lemtur nati sangdong ka nung ashi.
Shisatsü agütsür ka aser lanu putu asoshi len sayur ka ama asütsü atema Tsüngremi Dr. S.C Jamir nem anema aliba taküm den arishi talang moajang ta sarasademtsür, ta ASTD mendenpurtemisa metetdaktsü.