ASTD-i nisung tsükseter aputsü akanger

Dimapur, May 03 (TYO) : April 30, 2017 anogo nung Patkai College apu anasa gari kati Longkong nunger Ao senso tajung par asem tashi tsükseta yutsür ajenba mapaji kanga koa aitsür ta tanü sangdong ka ajanga Ao Senso Telongjem Dimapuri metetdaktsüogo.
Temzüng ozüng amertemi iba ama taochi maka inyakba nisung tamajungerji yakta pua tapet temerenshi agütsütsüla ta ASTD-isa takangba ka metetdaktsü.
Ano, tanü osang ka ajanga angazükba agi, April 30, 2017 nü Dimapur nung nisung asem tashi tsükseta yutsür ajenba gariji Tata mobile gari liasü aser iba gariji Dimapur-Kohima lenmang len Chate ayong anasa alu ka nung anena lia policetemi nguogo saka gari anishisangbo jena orr mali asü. Dimapur police-i paji maneni bushidagi.