ASTD-i PAC dang pelar; Maneni nungittsü

Dimapur, November 15 (TYO): Naga Council Dimapur (NCD) kübok Public Action Committee (PAC)-i state aser talisa Dimapur district nung ozüng alema sen saruba inyakyim ajema kümdaktsüba atema kanga pelar, ta Ao Senso Telongjem Dimapur (ASTD)-i metetdaktsüogo.
October 31, 2013 nü “Sorkar Ka, Saru Ka” ta bangzüng renemba nung ASTD-i noktaka lir aser iba tangatetba nungi masetshitsü, ta Tir L. Wati Jamir aser Tezülur K. Mar Lemtur nati sangdong ka nung ashi.
“Linük tenzüker ta asüba tenüng amer PCA züngsemtem mesüra parnok kibongtem amokmerenba ajanga khuret kecha mekoktettsü, kechiyong Naga nunger ajaki mapa ka mesüra ka ajanga linük tenzükba wadang nung shilem agiogo. Anungji, telok shingaia amokmeren masütsü metetdaktsür aser kari danga inyakra, iba tebilemtsüji iba telok jagi abentsü,” ta ASTD-isa metetdaktsü.
Sorkari aser talisa ozüng amertemi Nagaland state aser talisa Dimapur jila nung iba ama ozüng alema inyakba maparen azüoktsü atema ayongzüker, ta ASTD-isa ashi.