Aston Villa-i Ezri Konsa alizükogo

Chiteni/July 11, 2019 (Agencies): Aston Villa puri Brentford nungi defender Ezri Konsa den tenangzüktepba ka yangluogo, ajisüaka pa sen kwi yong ayok ajibo osang tejangja magütsü, ta Premier League-i taküm atuba culb-i Brehostibarnü sangdong ka ajanga metetdaktsü.
British media sangdong ajanga ashiba agi, arishi küm 21 tain Konsa ya taoba mapang Villa boss Dean Smith den Brentford nung külemi shilem agia liasü aser pa pound million 12 langa lir.
“Onoki bushiba asayar yimya Ezri-i abensatsür,” ta Smith-i ashi.
“Pa sempet tajung aketba asaya ka lir shibai Premier League nunga junga asayatettsü aser pa den inyaktsü matateter,” ta paisa ashi.
Konsa, shiba Charlton Athletic’s youth system ajanga aru, pa England tenüng nung under-21 jenjang nung asayaogo aser 2017 küm under-20 World Cup akoba team nung pa densema liasü.
Smith-i aniba teloki taruba season atema asayar aliba nung pound million 50 dak tema indokogo. Parnoki iba hopta tetenzükeln Bournemouth nungi Tyrone Mings alizük aser ibaji masüdang Anwar El Ghazi, Matt Targett, Kortney Hause, Jota aser Wesley nunger alizükogo.
Villa pur season asem tashi second division nung asayaa aliba sülen taküm Premier League-i meyipa aitogo aser parnok August 10 nü mezüngbuba asaya Tottenham Hotspur den asayatsü atema ataa lir.