ASUD-i ayongba ‘Autumn Huddle -2’ tenzükogo

‘Autumn Huddle-2’ lapokba sentong nung tongti tesemdanger  Soil & Water Conservation, Director, T Imkongmar Aier den takok half marathon nung angurtem külemi agiba noksa angur.

Dimapur, October 19 (TYO): Ao Students’ Union Dimapur (ASUD)-i ayongba ‘Autumn Huddle-2’ asayamung, Director, Soil & Water Conservation, T Imkongmar Aier-i lapokja tanü half marathon asemtepogo.
Mile tenet ser tesadang marathon ya DC Court lenjem nungi tenzüka City tower, Dhobinala aser Duncan Basti lunger DC Court lenjem nungsa tembang aser ajak agi nisung 239-i shilem agia liasü.
Asayamung lapokba sentong nung T Imkongmar Aier-i Dimapur nung aliba nüburtem sabang ka nung anidena shilem agidaktsüba asoshi ASUD nem tenüngsang agütsü.
Pai, shilem agir ajaki mulungsentsü temerük nung yimjung asoshi ka küma longjemer loktiliba asoshi temelenshi bener arur ka ka asütsü merangang, ta tayongzükba agütsü.
Iba asemtepba nung tebur tarensen nung Tsole-i mezüng jenjang, Nukshi Walling-i tanabuba jenjang aser Peter Mbung-i tasembuba jenjang nung takok angu.
Ano tetsür tarensen nung Khrieno-i mezüng jenjang, Tsüchoit tanabuba jenjang aser Songmo-i tasembuba jenjang nung takok angu.
Tebur aser tetsür takok angur asoshi Geetanjali, Synergy Systems, Ao Lanur Telongjem Dimapur, Muffet’s Pantry, Wedding Pathways aser Life Sports telok temi senpet ajak tenla liasü.
Asemtepba nung takok angur mezüng nem sen 10,000, tanabuba nem sen 5000 aser tasembuba nem sen 3000 senpettem agütsü. Iba dak alia ano sempet tanga tenlartemji World of Titan, Barefoot, Hill Star Theatre, Origin boutique aser Live Now nunger liasü.
Hombar nü marathon asemtepba nung Tsole-i minute 15 ser second 2 nung mile tenet ser tesadangji asem ma-a Autumn Huddle 1, 2013 nung Ebenezer Orphanage Home nungi arishi küm 13 tain, Manje Konyak-i minute 20 nung atongba mapang ajateta otsü tasen yanglutetogo.
2013 küm iba tetoktepba nung ajak dang tanubusang, Manje Konyak-i takok anguba mapang pa nem sen 500 senpet den kulikaket ka agüja liasü.
Iba sentong tenzüka Diphuphar Ao Baptist Arogo nung Youth Director, Enyar Jamir-i temoatsü meshia sarasadem.