ASUD-i DMC Administrator Moa Sangtam dang pelar

Dimapur, Luroi/August 17 (TYO): Ao Students’ Union Dimapur (ASUD)-i sangdong ka ajanga Moa Sangtem leniba nung Dimapur Municipal Committee (DMC) dang pelaba lemsatep.
“Wb. Moa Sangtam-i pa Dimapur nung administrators tajung rongnung ka, ta kuli sayuogo. Pai office mapa agizükba mapang nungi jila tesem balala nung terenlok aliba angur. Pa lenisüba nung asalentong tajung yanglubaji tenüngsang agutsütsü tetemsü. Iba ya ajanga Dimapur ya nisung alitsüsa, tangu sashia litettsüsa melenshitsü atema maneni sensotem ajungmesor,” ta ASUD Tir, Lanutoshi Aier aser tongti tezülur, Moayanger Jamir nati sangdong ka ajanga metetdaktsü.
“DMC den longjemer ASUD-i PWD office anasa metre 190 tetsüng lenmang yanglushiba maparen inyaka arur, aser kobi melii iba tesem ya semept tajung alir artist pongu akumba team-i kanga tepor tajung tesem ka küma yanglutsütsü. Asenok aliba yimti atema langka tajung inyaktsü asoshi iba maongka onok nem agutsüba atema pelar,” ta ASUD sangdong nung shia lir.
Iba dak alia Union-i taruba ita tem nung Super Market, nung südoksünemtsüsa tesem ka yanglutsü sentong lir; taküm Yimpoksüi/November ita nung agitsü aliba ASUD Golden Jubilee benjungmong nüngtem nung Union-i project ana ya inyaker, ta parnokisa metetdaktsü.
Iba dak sendakba nung Union-i ajak nem nungitdaktsüner, ta mepishia metetdaktsü.
“Tan putu nung alima tsüngküm mongpu melenshiba aser alima lendong balala atema asalentong yangluba den külemi Dimapur nung alirtemi natural resources wazüka ayutsü aser nüburtem meyong kiojen wazüka ayutsü mapang tongogo,” ta ASUD lenirtemisa metetdaktsü.
ASUD-isa lanurtem dang A Better Dimapur, Team Clean aser Team Green mapatong nung amalitepa yariteptsü ayongzüker, kechiyong item mapatong ajanga asenoki küm aika shisatsü anguba junga amshitsü atema maongka angur, ta mepishia metetdaktsü.
“DMC-i asen jila ajungkettsü atema lenla ajak nung inyakba asoshi ASUD-i DMC dang lepshia pelaba lemsateper. Onoki DMC Administrator Moa Sangtam dak tamang akar aser pa ketdangsüba kübok tarutsü nunga Dimapur-i maneni alizüng aika tongtettsü ta melung alemer,” ta ASUD-isa metetdaktsü.