ASUD lokti senden den Award agütsüba sentong agi

Dimapur, Metsüremi/March 30 (TYO): Tanü IMC, Dimapur nung Ao Students’ Union Dimapur (ASUD) 44buba lokti senden den 13buba Excellency Award sentong repsema agiogo; iba sentong nung tetushi tejaokerji Director CECS, Nodal Director, Childline Nagaland, Subonenba Longkumer liasü.
Youth Director Incharge, DABA, Limaakum-i sarasadema iba sentong tenzük, iba sülen ASUD Tir nungi anisüngzüker, Lanutoshi Aier-i lokti pelaa agizükba o jembia liasü.
Mezüngbuba senden nung Sentikala aser Moajungla Jamir nati ken aten aser tesüiba küm ana tsüngda shisaliok nung jenjang tajung angurtem nem merit certificates agütsü. Iba sentong nung DNSU densema tribal tentet balala nungi züngsemtem aden.
Tetushi tejaoker o jembidang Subonenba Longkumer-i kaketshirtem dang tetsü taso o meimtsü aser pei sobaliba tera metettsü ayongzük.
Iba dak sendakba nung pai, benjungmong aser sentong balala nung sobaliba sobutsü sobuba kija agi pei maitsü mejangjar, anungji pei sobaliba tera tejangja metettsüla, ta ayongzük.
Paisa, nükjidong tejangja meyui shisaliok bushiba yimya anentsüla, ta ashi.
Iba dak sendakba nung pai, nükjidong tejangja mayuba ajanga tanü Nagaland nung zünger mapa manguba agi timtemer, ta ashi.
Paisa kaketshirtem dang pei tarutsü atema asalentongtsü aser mapa meranga inyaktsü ayongzük.
Tanabuba sentong nung committee balalai osang agütsü, iba sülen o lemtepa liasü.
Iba sülen Nominating Committee Convenor, Sungkum Aier-i ketdangsüa office ketdangpur tasenpurtem nem tenangzükba agidaktsü aser Associate Pastor DABA, Imnatoshi Longkumer-i tang shimba tasenpurtem nem temeja sarasadem ka agütsü.
Taoba mapang ASUD züngsem, Sunep Jamir-i sarasadema iba sentong tembanga liasü.

2019-20 kümsük atema office ketdangpur tasenpurtemji:
President : Moayanger Jamir (Chuchuyimlang)
Vice President : Temsukaba Aier (Mopungchuket)
General Secy : Aoniken Walling (Khensa)
Asst. Gen. Secy : Lanuwapang (Asangma)
ASUD Advisors shimokertem: Limatemsu Longkumer, Limatangit Lemtur aser Imcha Longkumer