ASUD puri Quarter marathon asemteptsü ayongzüker

Dimapur, Aenjeti 19 (TYO): Golden Jubilee nüngtem nung Ao Students’ Union Dimapur(ASUD) puri Aenjeti 29 nü quarter marathon ka ayongzüka asayatsü asoshi renema lir. Iba asemtepba nung Dimapur nung alirtem ajaki shilem agitettsü. Iba sentong ya küm peyong jubilee nüngtem nung sentong balala ayongzüka akatsüba tetenzüker asütsü. Quarter marathon asemtepba nung tetsür aser tebur jenjang nung takok angurnem senpet agütsütsü. Mezüngbuba jenjang nung takok angurnem sen 20,000, tanabuba jenjang nung takok angurnem sen 10,000 aser tasembuba jenjang nung takok angurnem sen 5,000 agütsütsü. Iba den bendenloksema consolation senpet meyirejang kaka tetsür aser tebur asemteper pongungu nem agütsütsü.
Iba marathon nung asemteptsüba atema tenüng angati agi züngoksemtettsü aser tejangrartemi parnok tenüng iba anogo nung anepdang 5:00 ako nungi 5:40 ako tashi nung State Stadium nung züngoksemtettsü. Anungji asemtepertem ajak mapang shidak nung aru pei tenüng züngoksemtsü asoshi asayamung ayongertemi metetdaktsü. Iba sülenang chest number agütsütsü.
Asemteptsüba lenmang yamai alitsü:
State Stadium-Tajen Ao Road-City Tower-Khermahal Police Point-Overbridge-Burma Camp Police Point-Walford-Supermarket-Flyover-Nyamo Lotha Road-Dhobinalla-PWD Road-Duncan Basti-State Stadium.
ASUD menden ajanga Dimapur nung kin aser lokti balala nungi tejangrar kija aser lokti tentet balalai iba asemtepba nung shilem agia sentong takok ngudaktsütsü aser iba ajanga maneni Dimapur nung alirtem tali longjemshir aotsü asoshi ayongzük. Union ajanga talisa taoba mapang nung mendenpurtem aser züngsemtem ajak iba marathon sentong nung arua shilem agitsü asoshi pelashishia jaoker.