Asüng 1 ako tashi nung CM Candidate sangdongang: Kejriwal

New Delhi, Tsüklai/February 4 (Agencies): Aam Aadmi Party (AAP) national convener Arvind Kejriwal-i Mongolbarnü, BJP party dang Bodhbarnü 1:00 ako tashi nungbo chief ministerial candidate sangdongtsü asoshi jazükba den CM candidate den o tokteptsü asoshi renema lir, ta ashi.
Kejriwal-isa, BJP-i atakzüktsüba mapang tashi nung candidate mesangdongra pai pa indang taruba jenjang sangdongtsü asoshi osangbenertem den ajuruteptsü, ta ashi.
“Delhi nung alirtemi BJP nem chief ministerial candidate sangdongdaktsüner aser ni pa den o tokteptsü asoshi renema lir,” ta pai February 8 nü election atema AAP manifesto sayaba sentong nung ashi.
Linük yimtiba nung terenlok aser tesem kar nung Citizenship Amendment Act (CAA) anema longkak aitba densema onük balala nung Kejriwal aser BJP party o agi toktepa arudar.
BJP puri aiben Kejriwal dang kiralongrar jaa pa aitsüogo. Chief minister-i Hombarnü Hanuman Chalisa azüng aser ashiba agi, Hinduism ajungkettsü asoshi BJP temelaba agitsü kecha nüngdak mali.
Kejriwal-isa, Shaheen Bagh mokdanga aliba dak sendakba nung BJP aitsüogo aser ashiba agi, iba longkak aitba ajanga BJP pur ajangzüktsü meranger.