Asüng Aor kong nokdaktsü ?

–  Talitemjen Imchen

Ao Senden tenzüker iba ashi (umbrella) kübok, netsüng ajak Aor chanu ka ka ama merenmerena arudang, Kimen dang yutsür ketdangpur ajak anentsüsa akümbaji, Aor aser alima asoshi otsü tasen ka asütsü. Iba ama tensa tasen ajangshidang Aor chanu ajaki kanga shisadangtsü nüngdaker. Kechiaser yimya agi tensa den tapet tanü kechi alimai telemtetba agidir, asüng itemji sobaliba yimya ka ama küma benshia aor aser ibaji apongmen ser asüng Aor noktaktsü.
Ao Senden ketdangpurtem Federal Councili Mendenpurtem menden nungi anentsür ta osang kaket balala nung 15th Nov. 2016 adoktsür ngua kanga aoksar. Osang kaket ajanga metetba agi, Ao Senden Mendenpurtem mapa nungi anenba shity züluba metetdaktsüba dak ajemdaker Presidential Council ajanga Federal Council ayonger Nov. 14 2016 anentsütsü telemtetba agi ta shia lir. Ketdangpurtem anentsütsü telemtetba federal assembly telemtetba agibaji tatempang asütsü asü, mesüra anentsürtem asoshi mera tasen kar lir? Alima dang asünung parnok dak talang aibelen taidok lenmanga lir asü mali?
Lenirtemji shimtetdang, Yimkong Mungdangi tatsü talang ajak metetjema shisadanger shimba nübu tajung aser lenir tajung asütsü ta mezüjaa shimtet. Parnokji pei pei jangraba balala nungi tetoktepba ajanga shimba masü, saka netsüngi telok anitsü nungloktsüba lenirtem lir. Parnok menden nungi anenba agizüker ta osang kaket nung angudangji ajak asoshi taoksatsü akümer. Amanger Federal Council ajanga ketdangpurtem anentsütsüsa kulitemji tabensa anguba sülen dang ibai inyak südi? Item kulitemji netsüngtemia angajemtsüsa osang kaket nung agütsü nungbo ajungtsü. Parnok dak kechi tai lir aser joko tarak aketba nübu ta züngshitsü asü koba jenjang nung amshitsü netsüngibo ku sümongtetka tashi meteta maka. Mesüra tapet temerenshi agütsübaji alima danga metetdaktsütsü junger. Kechiaser tanü tashi netsüngibo parnokji tarak maket ama dang bilema, anentsüba kulitemji mengui ratatepdagi.
Parnok dak kecha bushisüngdang mesüi, parnoki mapa doktsüba shity nung dang ajemdaker telemtetba agir lira, parnoki züluba shity nungji ajemdaker asüngdangyatsü nüngdaker. Shibai metet? Tanübo parnoki mapa makokba agi anener alitsü akok? Saka tarutsü mapang ketdangpurtemi senotsü aika chir anenba shity agütsüdang, teloki bushisüngdang mesüteti, shityji dang agizüktsüsa kümra, asüng Aor kong noktaktsü? Aor loktibo aiatai asütsü. Tanü Aor lokti tekolakba nung iba timtem ataloktsüsa akümbaji, joko tanüngba teloktesen balala nungjia iba ama yimyatem ya ataloktsü menua maka.