Asüng Kilirtem – T.Ken 78:1-8

Tarutsü putu asoshi asenok teinyaktsü lir. Ken züluri zülur, ” Parnok chirtem dang nungi itemji onoki miima mayutsü, saka Kibuba tenüngsang, aser pa tashi, aser Pai inyakba sayatenyatem tarutsü putu dang ashitsü”(t.4).
Kechiba asenoki tarutsü putu den Tsüngrem o lemsateptsü? ” Aser par tsürabur ama, tashi mangaba aser mazüoktetba putu ka”(t.7). Ibaji tarutsü putu asoshi parnok terünemba lir, kechiaser teimlai tarutsü dak repranger. Yisu Khrista shia aruba ajanga khristantem taküm aliba tamang nung tanaben aso. Asenoki metet asen Kibuba tanaben arutsü aser asenok asen kidang kotaki anir atutsü. Tanu lanur putu nung aikati teimla sen nung, sorkar dak mesüra parnok tashi dak teimla yur lir. Anungji asenok tarutsü putu dang parnok teimla Tsüngrem dak ayutsüba ashiba ajanga asenoki Kibuba temoatsü taruba putu den lemsateper.
Tanabuba, taruba putui Tsüngrem mapatem bilemtettsü asenoki aginer. Pai asenok asoshi inyakba amadoktsü koda temela ! Ajisüaka, asenoki taruba putu nem bilemdaktsütsüla. Shirnoki tesüiba amadoker parnoki maneni kasa aibelenji inyaker.
Tatemsa, taruba putui Kibuba ozüngtemji ayutsüsa asenoki Pa mapatem lemsateptsüla. Ken züluri ozüngren taküm indang mejembir. Pai Kibuba dang meima meimba indang jembir. Au putu tasen dang asenoki teinyaktsü ka lir,aser tatishitsü tajung, sayuba ajanga, lemsatepba aser ajungshiba ajanga asenoki asen mapa ataloktsür.
Ne nem Khristan senmang agütsü. Kodang nai taruba putu den Tsüngrem o aser mapa, nai parnok dang senti lesson ka Pai pa nübur taküm inyakba sayur. Tatishitsü tajung ka alitsü merangang, koba tarutsü putui Kibuba asoshi alitsü tasü indaktsür.