Asüng nükla atema tanü inyaktsüla: Dr. Imtiwabang

Mokokchung, Nov 10 (TYO): Parliamentary Secretary for Geology & Mining, Dr. Imtiwapang Aier Congress party nungi Naga People’s Front party nung denür külen, tang mezüng süa par 23 Impur Assembly Constituency NPF party tenzükertem den sensaksem senden ka Brihostibarnü Kobulong nung menogo.
Pai tanü iba sentong nung jembidang, party nung tenzükertemi sen dak dang merangloki, party tashi ita bener aoba maparen nung temulung agütsütsü, ta ashi.
‘Asüng nükla atemaji tanü inyaktsüla, anungji o kisüng jembibaji tongtibangba masü saka mapa agi sayutsü tim,’ ta paisa inyakdaktsünüba olen ka ashi.
Paisa tekümdangtsü o ka ashidang, ‘party tenzükertemi olulu jembiba nung memangmangtsüla’. Iba dak sentakba nung ashidang, mejangjaba/mangatetba onük mesüra arendakba kar danga lira pa den tongteprateptsüla.
Party tenzükertem bendanga tenzükba den kati ka den tesendaktep tajung yur alima kara ainba den lirumedema aotsü asoshi paisa tayongzükba ka agütsü. Paisa terenlok mapa inyakbatem, tang teinyakdaktem aser tarutsü nung inyaka aotsüba tebilemba kar lemsatepa liasü.
Iba senden nung NPF Mokokchung Division Tir Wb. Moasangba Jamiri jembidang, party nung lenir ka dak lenisütsü sempet alitsü nüngdaker, aser lenir kaji kenüyongi ajungbena makümer, ta ashi.
Lenir ka dak lidaktsünüba kar ashidang, tangar dak nendaka melii pei sasa mapa meranga inyakba, Tsüngremi agütsüba sempet meteta inyakba, libaliru aser inyaksangshi ajanga tatishitsü sayutetba nübu asütsü nüngdaker.
Sen, mapa aser pei nija tajangzük balala bushitsü nükjidong nung party tenzükra, party kaji kodanga junga maotsü, ta paisa ashi. Iba den ano tangar majung jembiba yimya melenshitsü asoshi paisa ajungshia liasü.
Asüng yanü party balala adoktsü akok aji saka, “NPF party ya dang tebu asütsü”, ta ashi. NPF party ya ochi nung Tsüngrem dang sarasadema tenzük asünung, party tenzükertemi ibai zübazüba magii akhümtsübutsü, paisa shisem.
Tanü iba senden nung 23 A/C NPF tir Wb. K. Meren Lemtor menden liasü. Senden nung NPF Mokokchung Division kongsang balala nungi ketdangsertem den 23 A/C kübok telen balala nungi ketdangsertemi o tatsütsü jembia tepela o den tayongzükba aser tajungshi o bener arua lemsatep.