Asür Abdul Kalam mang Delhi tongogo; Tanurtemi anir tetushi agütsü

New Delhi, July 28 (Agencies) : Taoba Tir APJ Abdul Kalam mang Mongulbar nikongtsütsü Delhi nung par 10 Rajaji Marg ki tonga bener aruogo.
Tesüiba küm 7 tashi Delhi nung Dr. Kalam iba kidang liyonga aru aser tanü pa mang bener aruba sülen nisung meyirjang aika adenshia tetushi agütsü.Tesentepertem rongnung tanur telok ka liasü aser parnoki golab naro bener arua tetushi agütsü.
Par kidang tetushi agütsürtem rongnung Tir Pranab Mukherjee, Tatong Tir Hamid Ansari aser Prime Minister Narendra Modi nungertem dena liasü.
Parnok den taoba Prime Minister Dr Manmohan Singh, Congress Tir Sonia Gandhi aser lar jabaso Rahul Gandhi, Samajwadi Party tanishir Mulayam Singh Yadav aser par jabaso Uttar Pradesh Chief Minister Akhilesh Yadav nungertem liasü
Asür Kalam mang Delhi Palam airport tonga bener aruba sülen Tir Mukherjee aser PM Modi nati agizük.
Asür Kalam den asüpila sentongji Brihostibarnü Tamil Nadu kübok pa tasodak Rameswaram nung agitsü.
Dr. Kalam-i pa tedi arishi küm 99 tain Mohd Muthu Meera Lebbai Maraicker toktsür alima nungi pilaogo.
Sorkari linük ajunga nung “People’s President” ta ajar nem akhümtsübu agüja anogo tenetnü mangyimtsü osang metetdaktsüogo.
Hombar nikongtsütsü Meghalaya yimtiba Shillong nung Dr. Kalam-i Indian Institute of Management nung o jembidang pa temulungjang mapa meinyaki kümer lao aser ibaji pa atema arishi tatembang liasü.
Dr. Kalam nem akhümtsübu agütsüba sayua Mongulbarnü Parliament senden magi. Lok Sabha o Rajya Sabha naprongla nung July 30 tashi senden magitsü telemtetba agiogo.
“Dr. Kalam ya mezüng linük rongsen ka liasü aser iba sülen jiang Tir liasü. Dr. Kalam indang takümji khenyongi balaka liasü aser pa taküm ajanga asenok ajungmesor, pa taküm ajanga lanurtem ajungmesor” ta PM Modi-i tanü metetdaktsü.
Dr. Kalam dang ‘Missile Man of India’ ta ajar aser 1998 küm Pokhran-II nuclear tests takok ngua agitetba nung pai shilem tulu agia liasü. Pai mapa tajung inyakba ajiteta pa nem Padma Bhushan aser Bharat Ratna sempettem agütsüogo.
Pa arishi küm 70 tema lia, 2003 aser 2006 küm ana tashi pa MTV Youth Icon of the Year atema tenüng shimok.