Asür Bendang Longkumer mang ayimer

Dimapur, November 7 (TYO): NIDC nnug Managing Director aser OSD, Industries & Commerce, Bendang Longkumer shiranga aruba sülen tanü New Delhi nung asüba osang angashia temulung raksar, ta Chief Minister T.R Zeliang-i sangdong ka nung metetdaktsü.
Asür Bendang Longkumer ji Nagaland Page yimozülur, kibur aser publisher Wt. Tiamerenla Monalisa Changkija kinungbo lir aser pa ya mapa nung kanga dang tenendak aser nisung tajung ka liasü, ta paisa ashi.
Asür Bendang ji Mokokchung district kübok Yaongyimsen yimtsüng nungi aser pa ya asür Er. Tsukti Longkumer’er jabaso liasü. Pai kanga dang bendanga agüja aser shilem tulu agia sorkar tenzükba mapa inyakogo aser pai inyaka toktsüba mapa tajungtem teti bilemtettsü, ta chief minister-isa shisem.
Pai iba akümli toktsür aobaji kanga dang takoksa ulura aser iba mapang ni aser ozü kibongi tasür kibong den asükhu lemsateper. Maneni asür tanüla teti asoshi anisüngzük ngudakjangma ta sarasademtsür, ta TR Zeliang-isa sangdong nung metetdaktsü.
NPF President aser MLA, Dr Shurhozelie Liezietsu-ia sangdong ka nung Mrs Monalisa Changkija den asükhu lemsatepba metetdaktsü.
Tanü anüngdang New Delhi nung Bendang Longkumer asüba osang angashia temulung raksar. Ni pa den aiben ajurutepogo aser pa ya tetemjen tebur ka, o tanük aser pa mapa nung bendanga agüja inyakba nisung ka ta ajitet. Pai Industries & Commerce department asoshi mapa tajung inyakogo aser sorkari pa nübo kanga amshiogo, ta paisa ashi.
Pai iba lima toktsür aobaji sorkar aser loktiliba atema takoksa ulura lir. Iba ama tejashi mapang nung ni na, nür tanurtem aser temeimertem den asükhu lemsateper. Tsüngremi nenok nem tesünep aser tashi agüjang ta sarasademtsür aser tasür tanüla anisüngzük ngudakjangma, ta Dr Shurhozelie-isa shisem.
Maneni Nagaland Press Association (NPA), Nagaland Post, Nagaland Page, Eastern Mirror, Tir Yimyim, Capi, Dimapur Press Club, Kohima Press Club, Mokokchung Press Club aser State BJP temia sangdong balala nung asür Bendangtoshi Longkumer asüba atema mangyimba aser asükhu lemsatepba osangtem metetdaktsü.