Asür Bendangnungsang aser asür Khriesavizo nem tetushi agütsü

Dimapur, February 26 (TYO) : January 31, 2017 aonung Naga nunger temeten atema taküm bendanga agütsür adianu ana nem tetushi agüja, Deobar nikongtsütsü Diphupar village ground nung candle light service ka ayongzüka agiogo.
Iba sentong nung nisung noklang aika adenshia, asür Bendangnungsang Longkumer aser asür Khriesavizo Metha na nem akhüm tetushi agütsü.
Joint Coordination Committee (JCC) Co-Convenor, Vekhosayi Nyekha-i sentong nung o jembidang, asenok alizüng matong tashi meranga inyaktsü aser asenoki takhangba agütsübatem asoshi telangzüba ajak mangu lir, ta ashi.
“January 31 nü Naga nunger lanur ana kahsetba dak sendakba nung ketdangsertem aser jawan tem, aser parnok den külemi Longleng district administration ketdangsertem mapa nungi anentsütsüla. Ketdangsertem mapa belenba agi meperir, iba ya Naga nunger mezüngmeshiba inyakyim ka lir, anungji aibelenertemji ozüng tapet agi merenshitsüla” ta Vekhosayi-isa ashi.
Paisa, state sorkar dang mapang shitak nung mapa inyaktsü, aji mesüra khuret ajurutsüsa akümtsü, ta tekümdangtsü olen ka shisem.
Diphupar Naga Youth Organisation (DNYO) nungi lennir kati o jembidang, asen yimten yimsüsüri asenok ashioktsü aser ibaji ajanga asenoki sorkar anema nokdaktsüsa aküm, ta ashi.
Asenoki takhangba agütsübatem ano ajak meinyakma lir, anungji asen temeten kümzüka ayutsü atema asenok tali tashi itshidi, ta paisa ayongzük.
Naga nunger atema asen adianu anati tena taküm bendanga agütsübaji amajok mesüdaktsütsü atema nisung ajaki yariteptsü mepishir, ta DNYO lennirisa shisem.
“Asür Bendangnungsang aser asür Khriesavizo nati taküm bendanga agütsüba atema tenüngsang agütsür aser tena ya Naga loktiliba nung ‘hero’ tem lir aser kodang mamatsü” ta Diphupar Naga Students Union (DNSU) nungi lennir katia o jembidang ashi.
“Asen oboula nungertemi kanga dang meranga aazüka yutsüba Naga nunger temetentem, tanü asen lennirtem yoka achitsü meranger aser iba asoshi kanga sasa bilemer. Naga nunger temetentem kümzüka ayutsü mechi asen adianu anati taküm bendanga agütsüba ya amajok mekümdaktsütsüla aser iba ya tetenzüker ka sür, asen alizüng matong tashi mapa inyakdi,” ta sentong nung asür Bendangnungsang tenuia o jembidang ashi.
Asür Khriesavizo tebu, N. Mehta-ia o jembidang par jabasoi January 31 anepdang pa den tatembangba jembiba olen bilemteta ashi.
“Kechiba Naga nungertem ya ka küma melongjemer?” ta par jabasoi iba anepdang pa dang asüngdang, ta N. Mehta-i ashi.
Jabaso asüba osang angashir, pa kanga dang temulung raksa, saka Naga nunger ajaki longjemba aser par kibong pusema nungitba angudang, Naga nungertemi joko longjemer liyonga aotsü ta pa nem teimla agütsü, ta N. Mehta-isa metetdaktsü.
Iba sentong nung Ao Baptist Arogo Diphupar sannüker, N. Lipok Jamir-i temoatsü meshia sarasadem, Diphupar Village Council aser Diphupar Naga Women Organisation nungi lennirtemia o jembi aser Angami Baptist Church sannüker, Sakho Theunuo-i shimo milen tsükloka tetushi agütsüba mapang agi aser paisa tenüngsang agüja sarasademer sentong tembang.
Taonung agiba sentong nung tasür nem akhüm tetushi agüja tesentepertemi minute ana ola madoki sarasadem mapang agi aser Achen Imchen, Gladis Kato o Monu Shin nungertemi ken ajanga shilem agi.