Asür Hukato Naga mang ayimer

Dimapur, October 27 (TYO) : London nung oa Hukato Naga asüba osang angashi dang kanga aoksa aser temulung shiranga bilemer, ta Lok Sabha MP Neiphiu Rio-i sangdong ka ajanga ashi.
Asür Hukato ji kanga dang tamang katetba entrepreneur, lokti atema aria bilemer aser tetenlar tajung ka liasü. Bendanga agüja aser meranga inyakba nung takok lir ta pa taküm ajanga tatishitsü sayur. Pai ajangshiba otsütem lemsatepa pai lanurtem ajungmesoa liasü, ta sangdong nungji shia lir.
Pai lanurtem dang teti meranga inyaktsü indang shia aru aser paia yamaji liteta sayu. Rio-i, kü medemertem den pa-a kanga junga metettepa medema aru. Pa asübaji ni aser ozü kibong atema kanga takoksa lir. Onoki pa dak sasapela yimya aser taküm nung tapu ajak tajunglen nungi agiba yimyatem kanga menungratsü, ta ashi.
Ozü kibongi asür kinungertem den asüku lemsateper aser asür tanela yimjung nung anisüngzükdangjang ta sarasademtsür.
Ano Nagaland Contractors’ & Suppliers’ Union (NCSU)-ia October 25, 2016 nü Nottingham, London nung Hukato Naga ajungbena asüba osang angashia kanga aoksa aser temulung mepelateter, ta sangdong ka ajanga lemsatep.
NCSU Tatong Tir K.L Setuo Rutsa aser Tongti Tezülur Imsünok Jamir nati, asür Hukato Naga ya M/s Naga Construction kibur aser NCSU registration No. 4088 kübok Class-I Contractor ka liasü. Pa ya Naga nunger rongnung kanga meranga inyaker pei wadang nung takok ngutetba aser ajaki tamang katetba shishilembar ka liasü. Pa temulung tulu, meranga inyaker aser yimya tajung aketba nisung asüba ajanga par tembartem ajaki kanga nükshi aser pa teyari nüngdaker ajak pai yaria aru. Pa asüba ajanga onok atema ongdang tazüng tuluka adokogo aser ibaji mesemtsü kanga melarabo masütsü. Pai tajung inyakba ajak onok mulung nung teti alitsü, ta sangdong ajanga ashi.
NCSU-i asür kinungtsü Deepika Hukato Naga, par tanurtem aser kinungertem den asüku lemsateper. Tulusang Tsüngremi asür kinungertem nem tesüneptsüba agüjang aser asür tanela tatem maka yimjung nung anisüngzükdakjang ta sarasademtsür.
Sangdong tanga ka nung ano S. C. Jamir-ia, Wb. Hukato Naga London nung asüba osang angashia temulung nung nemjema bilemer, ta ashi.
Pai, Hukato Naga ji linük aser bendanglen ajak shishilembaba mapa nung shisatsü peria aliba nisung ka liasü aser pai iba mapa kanga merüka inyakba ajanga Nagaland atema pa dak rangloka liasü. Lanuwa mapang samarua liaka tain küma aoba mapang taküm melenshir Tsüngrem den tesendaktep tajung yuteta aliba ajanga pa shisatsü nung kanga talubosa aküm. Tia makai pai state atema mapa tulu inyaktsü imla aliba mapang ka nung asenok dang nungi pa pila aobaji kanga tang takoksa tulu lir. Pa asübaji Nagaland atema kanga takoksa. Ni asür Hukato Naga den asüku lemsateper aser pa tanela yimjung nung anisüngzüktsü sarasademtsür, ta sangdong tatem küma ashi.