Asür Imtikumzuk Longkumer den Send-off Service agi

Dimapur, Rongjui (September) 24 (TYO): Tanep 8:00 ako nung Sericulture & Excise Advisor asür Imtikumzuk Longkumer den Send-off Service pa indang Official Residence, New Minister’s Hill Kohima nung agi.
Sentong nung asür Imtikumzuk kinungtsü Imkongzungla-i o jembidang, la kinungboji asüküm maliba, mapa nung tenendak aser nübor tenzüktsü jangraba nisung ka liasü ta ashi.
Pai kanga dang meranga mapa inyak aser public nüngdaktem peritsütsü atema teti bilema inyak. Pa ya temeim aketba kinungbo ka aser tanurtem atema tebu tajung ka liasü, ta laisa ashi.
Kohima Ao Telongjem Tatong Tir Chubalepzuk-ia o jembidang, asür Imtikumzuk Longkumer ji bendanga agütsüba aser ajemasüng aliba lennir ka liasü, ta ashi.
Higher Education Minister, Temjen Imna Along-ia o jembidang, asür Imtikumzuk’er kibongi tashi itta noktakba aser Delhi, Dimapur o Kohima nung nübortemi asür nem tetushi tulu agütsüba atema pelaba metetdaktsü.
Party züngsemtem, MLA tem aser par kibong tenüng nung Minister Along-i asür kibong den asükhu lemsatepba metetdaktsü.
NDPP nung Working President, Alemtemshi Jamir-ia “asür MLA ji mapa nung kanga dang bendang agüja inyakba nisung ka liasü aser pa dak sempet tajung aliba ajanga nübortemi pa kümsük anaben tashi takok ngudaktsü. Party-i pa maongyimer aser par kibong den asükhu lemsateper” ta ashi.
Sentong nung Imkong L. Imchen aser G. Kaito Aye natia o jembidang asür nem tetushi agütsüba den par kibong den asükhu lemsatep.
Ungma Senso Telongjem, Kohima Tiria mangyimba o jembidang, asür MLA Imtikumzuk ji Ungma Senso Telongjem Kohima nung Tatong Tir aser Tir inyakba nübo ka liasü aser pai USTK atema mapa tulu aika inyaktsüogo, ta ashi.
Sentong nung mendenji State Chaplin, Rev. Kuzierang Thou liasü aser telok balala nungi züngsemtem aden. Sentong nunga Nagaland Governor P. B. Acharya-ia asür nem tetushi agüja naro agütsü.