Asür Imtikümzük mang par tasoyim Ungma nung akhüm tulu agüja remogo

Ungma, September 25 (TYO): Sericulture & Excise Advisor, asür Wb. Imtikümzük Longkumer den tatemsabuba asüpila sentong “state funeral program” pa tasoyim Ungma Soyim Aonglenden nung agia, pa nem nüburtemi akhüm tetushi tulu agüja pa mang ali nem agütsüogo.
Tanü pa asüpila sentong nung kinunger nungi pa temeim kinungtsü Imkongzenla Jamir den Imtikumzük tebu Onentiba, jala Wangshimongla aser tenu Tinujungshi parnoki jembia liasü. Sorkar tsütsü nungi Minister Metsübo Jamir, NLA Speaker Vikho-O Yhoshu, Minister Imna Along Longkumer, Minister Tongpang aser Adviser Imnatiba parnoki jembia liasü.
Iba den ano Excise aser Sericulture department, National Democratic Progressive Party (NDPP), Ao Senden, Ungma Council, Ungma Senso Telongjem Kohima, Soyim Students Union, Anükabang, kin kidong; item telok balala nungi lenirtem aser meyongertemi shilem agia asür nem akhüm tetushi agüja liasü.
Nagaland Governor P.B Acharya aser Nagaland Chief Minister Neiphiu na iba sentong nung medentetaka, tenati anir telok aser lenir balalai yokba asükhu lemsatepba chitti-tem zünga metetdaktsü.
Asür Imtikumzuk Longkumer ya arishi küm 51 liasü. Pa January 21, 1967 nung aso. Pa ya Onentiba Lkr aser Talitula Jamir dak nungi jakzükba chirnur trok rongnung tambusang lir. Ungma nung dang soa intet aser pa lanuwa Mokokchung nung Lady Bird, Edith Douglas HSS, Senayangba GHSS, St. Jospeh College Bangalore aser Dimapur college-tem nung azüng.
Tebutsü Imkongzenla den 1989 küm kibong aküm aser Tsüngremi par nem jabaso ka den jala pezü moaja lir. Pa ya lanuwa nungi politic nung ajemok aser 1998-2013 tashi taoba Nagaland Chief Minister Dr. S.C Jamir indang personal secretary ka ama inyak. Pa ya political party nung dang masü saka lokti balala den yimden yimsüsüba nunga tatar tashi tenzüka aruba otsü ajanga angazüker.
Pa mezüng 2008 küm Independent candidate ka ama 26 Aonglenden A/C nungi election nung toktep saka tamakok ajuru. 2013 küm kasa constituency nungisa congress (INC) ticket nung toktepa takok angu aser Deputy Speaker (2015-17) aser Parliamentary Secretary DIPR, SIRD & Sericulture (2017-18) inyak. 2018 nunga NDPP ticket nung toktepa pai takok angu aser Sericulture & Excise Adviser mapa inyaka lia September 22, 2018 nü pa iba akümli wadang tembang.
Pa ya tebu tajung ka dang masü saka ajemaluba, ajak den sakuku litetba, tongmelang nisung ka liasü. Pa ya ochi aser indangindang aliba taküm, mangdang tulu akaba nisung aser pei atema mebilemi nübur aser lokti atema khuret süa bendanga tenzükba lenir ka liasü. Pa ama lenir ka anojungi asüba ya alima asoshi takok tulu lir.