Asür Imtikumzuk nem tetushi agütsü

Dimapur, Rongjui (September) 23 (TYO): Tanü asür Advisor Imtikumzuk mang Dimapur Airport tonga bener aruba sülen pa nem tetushi agütsüba sentong ka agia liasü
Sentong nung Chief Minister Neiphiu Rio-i o jembidang Tuophema aser Ungma tsüngda tesentaktep tajung aliba aser pai Imtikumzuk den külemi inyaksema aruba osang metetdaktsü.
Taküm NLA election nung takok anguba sülen asür Imtikumzuk temang manemi aküm aser tawa tu pai asür kinungtsü aser adianu den Delhi nung ajurutepa liasü ta Rio-i ashi.
Iba mapang asür Imtikumzuk kanga dang sasapelaa jembi aser state-i meyipa arur nübortem atema mapa inyaktsü jangraba lemsatep, ta paisa shisem.
“Party aser sorkar nung külemi inyaka arudang, pai kodanga mepelaba olentem mejembi saka pelaba o dang jembi. Pai iba lima toktsür aobaji tejashitsüka lir saka asenok ajak meimchir dang lir aser Tsüngrem’er sentong nung alir” ta Rio-isa ashi.
Nagaland chief minister-isa asür Imtikumzuk’er kibong dang pa aser pa den külemi inyakertemi yariteptsü ta metetdaktsü.
“Nenok kija masü saka onoka nür den külemi lir. Onoki pa atema kecha meinyaktsütet aser pai iba lima toktsür ogo, saka onok nür den külemi lir. Onoki nür den khuret aser tepela ajak lemsateptsü. Asenoki Tsüngrem dak tamang yudi aser Khrista dak teimla yur asenok akümlirtem liyonga odi” ta Rio-i asür Imtikumzuk’er kibong dang ashi.
NDPP President aser PDA Chairman Chingwang Konyak-ia asür nem tetushi agüja jembidang, 1990s mapang nungi pai asür Imtikumzuk den meteteper külemi inyaka aruba bilemteta ashi.
“1990s mapang ni NPCC nung tir inyakdang nungi Imtikumzuk den metetepa liasü. Iba mapang Aonglenden Assembly Constituency nung Congress youth tir inyaker asü. Pa kanga dang teyakyak lennir ka liasü aser jenjang teküpok nungi tang iba menden tashi atongba nisung ka liasü. Pa anojungi asübaji party atema dang takoksa ulura lir” ta Chingwang-i ashi.
HE & TE Minister aser State BJP President Temjen Imna Along-ia o jembidang “Asenoki jashir aser temulung rongsar saka par kibongi takoksa angubaji asenoki memetet. Tebu ka, kinungbo ka aser tanuri ashiba teti angaba tebu ka akoksaba atema ni tejashi lemsateper. BJP party, Deputy CM Y. Patton-i anir BJP Legislature Party tenüng nung ni asükhu lemsateper” ta ashi.
Minister Imna Along-isa Opposition lennir TR Zeliang-i anir par kibong aser NPF nungi MLA temi Delhi aser Dimapur nung yaritepba atema pelaba metetdaktsü.
Ao Senso Telongjem Dimapur (ASTD)-i asür Imtikumzük nem tetushi agütsüdang Ungma Senso Telongjem Dimapur dang iba maongka agütsüba atema pelaba metetdaktsü.
Asür Imtikumzuk-i iba lima toktsür aobaji Aor atema dang masü saka Naga nunger ajak atema takoksa ulura lir ta ASTD-i ashi aser parnokisa asür kibong den asükhu lemsatepba metetdaktsü.
Ungma Senso Telongjem Dimapur, Ungma Village Council aser Ungma Baptist Arogo tenüng nung o jembidang Supulepden Jamir-i asür Imtikumzük nem tetushi agütsütsü atema arur ajak dang pelaba metetdaktsü.
Asür Imtikumzuk kinungtsü Imkongzenla-ia pelaba olen lemsatepdang, Tsüngremi tashi agütsüba atema pelaba ashi. Laisa Minister Along, PRO to Chief Minister Rusemtong Longkumer, Nagaland House ketdangsertem aser Delhi nung kaketshirtem dang pelaba shisem.
Asür Imtikumzuk’er jalai o tatsüka jembidang teyariteper aika aliba ajanga la tebu mang melamela bener arutetogo ta ashi.
Iba sentong nung mendenji Dimapur Ao Baptist Arogo sannüker Imnatoshi Longkumer liasü.
Tanü Dimapur Airport nung sentong agiba sülen asür Imtikumzuk indang mang Kohima-i bener atu. Idak nung jagi pa tasoyim Ungma-i bener aotsü aser Mongulbar (September 25) anepdang 10:00 ako nung pa den State Funeral ka agitsü.