Asür Isak Chishi Swu tasoba anogo amung

Dimapur, November 11 (TYO) : November 11, 2016 nü NSCN/GPRN-i CHQ Hebron nung taoba Yariuwo, asür Isak Chishi Swu sor küm 87 ajungba anogomung bilemteta amung.
Iba anogomung ya “Taitoktepba, Temeim & Yimjung” omen nung ajemdaker amung, ta MIP/Hebron sangdong ka nung metetdaktsü.
Asenoki yimjung nüngdaker, nisung ajaki yimjung aginür saka Naga nunger tsüngda taitoktepba aser temeim agi anünga aliba ajanga ibaji monguteter. Asenok tsüngda taitokteptsü tangatetba ali nungang, yimjung alitsü ta asür Isak Chishi Swu-i teti mepishia aru aser pai iba osang ajanga Naga nunger ajak ayongzük.
“Tasoba anogomung amungba ajanga osang ka magütsüra, benjung amungba tetezü kecha mali. Boney M-i “Man will live forevermore because of Christmas Day” ta ken atener. Iba osang ya ken angar ajaki angaoker aser temulungjang nung kongshir. Ino Isak Chishi Swu-i nüjiso, taitoktepba, temeim aser yimjung osang aben” ta Kilo Kilonser, Rh. Raising-i sentong nung okila jembidang ashi.
Mrs. Eustar Chishi Swu, Steering Executive member-ia o tatsüka jembidang, CNC aser NSCN dang iba sentong ayongzükba atema pelaba metetdaktsü.
Naga nungeri Tsüngrem sülen anidaktsü melena, pei onüba lenmang nung dang jajar, Naga nungertem samatsü, ta laisa ashi.
Sentong nung Rev. Puni Mao, Member, Collective Leadership-ia o jembidang, “Taidok agütsüba ya Naga nunger ajak ket nung tagitsü oset ka ama alitsüla. Naga nungeri taidok agütsüba yimya benshira, asenok dangi yimjung arutsü” ta ashi.
Asür Isak Chishi Swu asoba anogomung nung tribal hoho tem, Civil Societies, kaketshir lennirtem, arogo lennirtem, temeimertem, NSCN züngsemtem aser temeket aliba yimtsüngtem nungi public tem aden.