Asür Khodao Yanthan indang kaket sayaogo

Dimapur, August 18 (TYO): Asür Khodao Yanthan indang taküm aser pai inyakba mapatem indang kaket ka Hokolbarnü sayaogo.
“Wounded Tiger” ta ajaba kaketji Rev. Dr. Abraham Lotha-i ketdangsüa zülu aser DABA Elim hall, Dimapur nung Controller of Examination, Nagaland University, Dr. Ademo-i sayatsü.
Iba kaket nungi tangazüktsü aika lir aser Naga nunger putiotsü chichiba zülua lir, ta tanü Dr. Ademo-i asür Khodao Yanthan indang kaket sayatsüdang ashi.
Asür Khodao Yanthan ya nüjiso atema rarar ka liasü aser pai pa taküm piyong Naga nunger atema bendanga agüja inyak. Pa iba akümli nung mali saka pai bendanga agütsüba aser mapa tajung inyaktsübatem teti asenok den alitsü, ta Dr. Ademo-ia ashi.
Iba kaket ajanga Naga nunger shia ajungmesotsü aser angazüktsü imlar. Asür Khodao-i toktsür aoba senmang tajung ya teti atema alitsü, ta Dr. Ademo-isa shisem aser paisa Rev. Dr. Abraham nem tenüngsang agütsü.
Rev. Dr. Fr. Abraham Lotha-ia o jembidang, “asen loktiliba nung yimten yimsüsürtem aika lir saka tetangshi, aika ajangshiba aser nisungtemi akhümtsübuba yimsüsürbo ka danga mali. Khodao ji tetangshi, aika ajangshiba aser nisungtemi akhümtsübuba yimsüsür ka liasü aser Naga linük nüjiso inyakyim tamendakdak nung pai tongti shilem agi” ta ashi.
Khodao ama lennirtemji tenoktenoka alizüng ayurtem lir aser shingaia parnok alizüktsü makok, ta Dr. Abraham-isa shisem.
“Wounded Tiger” kaket ya shilem pezü lemsa lir aser itemji, Khodao indang tangatetba, pai Naga nungeri pei sasa yimsüsütsü pusema zülubatem, pai tangar den shidi ajanga tongtepratepba aser pa den sensaksemdang aliba jembiba onüktem lir.
Rev. Dr. Fr. Abraham-i kaket aika züluogo aser item rongnung History of Naga Anthropology, The Ragging Mithun aser The Hornbill Spirit: Naga Living their nationalism tem dena lir.